PMAY Housing for All sem a ni

Urban Development & Poverty Alleviation department chuan nimin khan Electric Veng YMA Hall, Vaivakawn YMA Hall leh Chanmari YMA Hall-ah PMAY Housing for All (Urban) hnuaia Aizawla mirethei in sak ṭanpuina dawng turte kokhawmin, mi 998 hnenah ṭanpuina first instalment Rs 60,000 ṭheuh an sem. PMAY hnuaia hmalak dan inhrilhfiah a ni bawk.

Sorkar thuchhuah tarlan danin, Mizoramah PMAY Housing for All (Urban) hnuaiah in sak ṭanpuina dawng tur chhungkua 37,450 an awm a; ṭanpuina dawn tur chu Rs 1,50,000 a ni a, hlawm (instalment) thuma sem tur a ni.

Ṭanpuina dawng tur zinga chhungkaw 29,997-in first instalment Rs 60,000 ṭheuh an dawng tawh a, first instalment la dawng lote chu August 2023 ral hmain pek tum a ni. Kum 2024 ral hmain ṭanpuina sem zawh tum a ni bawk.