KHAWTHLIR

Thisen pe

Pachhunga University College NSS leh Red Ribbon Club chuan nimin khan an campus-ah session thara blood donation camp hmasa ber an huaihawt a, semester ṭhenkhata zirlai mipa 106 leh hmeichhia 37-te'n Civil Hospital, Aizawl tan thisen unit 137 an pe. ṬKP, Zobawk Bial pawhin an khuaah thisen pek huaihawtin, Lunglei Civil Hospital tan thisen unit 46 an pe a, petute mipa 38 leh hmeichhia pariat an ni.

Hnatlang thulh

Hualngohmun khawtlangin an khaw chhung /hnuaia Aizawl-Lunglei World Bank Road chhe lai hnatlanga siamṭhat an tum leh chumi vanga kawngpui dan an tum chu an ṭhulh. Hualngohmun khawtlang hruaitute chuan, hnatlannaa khawih an tum ber - tuihâwk luankar tihfai, leivûng paih leh kawng chhuat thawm ṭhatte chu nimin aṭang khan PWD-in an khawih ṭan avangin hnatlan an ṭhulh tih an sawi.

Congress inkhawm

MPCC chuan nimin khan Congress Bhavan-ah political session an nei a, MLA hlui T Sangkunga'n a kaihruai. Tun hnaia Congress party zawmtu Lalsanglura Ralte-in thu sawiin, BJP-in Hindu ram siam an tumna ngaihtuah chian a ngaih thu leh BJP thawhpui zawnga hma la party-te chu thláwp lo turin mipui a chah.

Upa Thanga zirho

Aizawl North College, J Thankima College leh Mamit College-a Mizo department-te chuan nimin khan DIET, Aizawl conference hall-ah Upa Thanga chanchin leh sûlhnute zirhona an buatsaih a, Aizawl North-II bialtu MLA Dr Vanlalthlana'n hmanpuiin, Upa Thanga Hauhnar chanchin ziahna lehkhabu a tlangzarh.

Lawmpuina hlan

Lunglei HPC vice chairman Lawmawma Tochhawng, MLA chuan nimin khan a pisaah Lungleia zirlai ti ṭhate leh Mizoram Nuchak 2023 intihsiaka pahnihna Zorempuii Khawlhring hnenah lawmpuina a hlan. Zirlai lawmpuina hlante chu - MZU-a B.Tech (Civil) gold medalist Michael Lalrinsanga Fanai leh Chemistry-a palina Merry Lalmuankimi leh, Garden University, Bengaluru M.Sc. (Psychology) topper Lalrohluzuali te an ni.

Vaccine pek tur rêl

Lunglei District Task Force for Immunization chu an chairman Ramdinliani, bawrhsap kaihhruaiin a pisaah an ṭhukhawm a, Intensified Mission Indradhanush (IMI) 5.0 vaccine pek dan tur an sawiho. IMI 5.0 hi kumin August 7 aṭanga October 14 chhungin vawi thum kalpui tum a ni a, Lunglei district-a naupang kum hnih hnuai lam 230, kum 2-5 inkar 136 leh nu nau pâi 42 hnenah pek tum a ni.

USA-ah kal

Hrangbana College-a associate professor (History) Dr Varsangzuali Varte chu United States-a International Visitor Leadership Program (IVLP)-a tel turin a kal. IVLP hi chawlhkar thum awh tur a ni a, US Consulate General, Kolkata sàwm anga kal niin, program hming chu Celebrating Indigenous and Cultural Heritage a ni.

MLA-in hawng

Mamit bialtu MLA H Lalzirliana chuan nimin khan a bial chhunga Vawngawnzo khuaah Mini-Sadbhav Mandap (Multipurpose Community Centre) a hawng. Vawngawnzo khawtlang hruaitute hnenah football, volleyball, net leh tarpauline a hlan nghal. Mini-Sabhav Mandap hi Aspirational district hnuaiah NITI Aayog aṭanga hmuh cheng nuai 50 hmanga sak a ni.