Rúlchàwmah zau takin lei a min Chenna in pathum a hnâwl

Nimin zing dar 7:30 pelh hret khan Rúlchàwm khaw chhungah lei a min a, in pathum a hnawl a, ina chengte an chhuah hman avangin thi leh hliam an awm lo.

Thu dawn danin, lei minna hmun hi metre 100 bial vel a ni. Mimal in luah lai pahnih leh sorkarin khawsak harsate in saksakna scheme hnuaia in sak zawh thawkhat tawh, la luah si loh pakhat a hnâwl. In neitute chu Hrangbawiha, F Kapliana leh Ṭhazeli (sak lai, la luah loh)-te an ni.

Rulchawm Branch YMA secretary C Lalrinmawia hnen aṭanga thu dawn danin, lei minna lai hi October 1, Ningani zing lamah khi ṭanin, a khi zau tial tial a, Ningani zan, zan tìr lam aṭangin an inthiar chhuak ṭan a, nimin zing khawvar aṭangin an inthiar chhuak chhunzawm leh bawk.

Lei min chhan hriat chian a ni lo nãin, a thlanga khelmual laih mek vang a nih theih thu, Rúlchàwm aṭanga thu dawnna chuan a sawi a; chutih rualin, khelmual tur laih lohna zâwnte pawh lei khìin a huam tel avangin a chhan tak hriatthiam a har thu Vanglaini palai a hrilh.

Lei min tawh chin bakah, lei khi vanga la min leh theia ngaih a awm a, chumi huam chhungah chuan in paruk - R Lalnuntluanga, C Lalfakzuala, R Ralthatchhunga, K Thang­zuala, K Lalchhuan­mawia leh Lalchhuanawma (sak lai) inte a awm a; heng in neitute hian nimin khan an bungruate an thiar chhuak nghal. Inthiar chhuak chhungkuate awmna tur chu VC leh YMA-te'n an ngaihtuahsak a ni.

A ṭul angte thawk turin nimin khan khawtlang hnatlang koh a ni a, an khaw ṭhenawm aṭang pawhin mi ṭhahnem tak an thawk chhuak. Lei a la chêt deuh avangin in ṭhiah ngam a la ni lo thung.

C Lalrinmawia chuan, lei minna lai chin min belh leh mai theia ngaih a nih thu a sawi a; an khuaa chhiatna thleng chu Saitual DC leh SP-te'n a hmunah an ngaihven nghal thu a sawi bawk.