MKHC-in dawhthei turin an ngen

Mizoram Kohhran Hruaitute Committee (MKHC) chuan kohhran inkhawm chung­changah sorkar thu­chhuah zâwm tur leh dawhthei hrâm hrâm turin mipui an ngen.

MKHC hruaitute hi ni­min khan an ṭhukhawm a, thuchhuah siamin, "Covid-19 hripui laka mipui himna atana sorkarin inkhuahkhirhna dan a siam angin hun rei tak biak-ina inkhawm thei loin kan awm ta a. Biak-ina inkhawm châk hle tawh mah ila, sorkar thuchhuah anga inkhawm neih rih loh zel hi hripui laka kan him zawkna tur a nih avangin dawhthei hrâm hrâm turin kohhran mipui kan ngen a ni," an ti.

Biak-inah inkhawm theih ni lo mahse inthlahdah lo tura mipui chahin MKHC chuan, "Chhungkuaa Pathian pàwlna, chhúng inkhawm uar zawka nei hrâm hrâm turin chhungkaw tin kan inngen," an ti a; kohhran mite chu mahni kohhranin Pathian an biak ní - Pathianni/Sabbath serh chungchang leh kohhran serh leh sãngte ngai pawimawh leh zual turin an ngen.

MKHC chuan, "Tun thlenga Covid-19 vanga Mizoramah thi kan la awm lo te, he hri vanga na zual lutuk kan awm lote hi kohhrante ṭawngṭaina Pathianin min chhànna leh hri donaa thawktute thawhrimna vang a ni," an ti a; Pathian hnenah lawmthu sawia theih­tawp chhuaha ṭawngṭai zel turin mipui an ngen bawk.