District tinah Faina Hapta hawn a ni

Nimin khan district tina khawpui hrang hrangah Faina Hapta leh khawpui fai intih­siakna hawn a ni a, hmun ṭhenkhatah chuan khaw chhung tifaiin an hnatlang nghal.

Lungleiah chuan Convention Centre-ah bawrhsap V Lalsangliana'n a hawng a; faina leh hmasawnna a kal kawp tlat tih sawiin, "Hmasawnna tluantling nei turin khawtlang nunah faina, hriselna leh thianghlimna a pawimawh. Kan in leh lo, kan chhehvel kan tihfai mai bakah, faina lamah rilru sûkthlêk kan siamṭhat a ṭul a, mipui rilruah faina kan tuh chuan inhrilh chawp ngai loin kan fai reng thei dawn a ni," a ti.

Faina Hapta pualin Lungleiah hian sorkar pisa, sikul, restaurant/motel, hotel, damdawi-in, veng (VC), bazar/market leh workshop fai thlan a ni ang.

Siahaah chuan chuan DC conference hall kawtah bawrhsap Kesavan R-in a hawng a; DC chuan, faina tluantling nei turin fai chu tih ṭhanah neih a ngaih thu sawiin, "Kan taksa leh kan in leh lo fai ringawtah i duh tâwk mai lo ang u. Kan khawlai, tuihâwk luankawr leh tui lâkna hnár leh luite a fai em tih hi kan vei a ngai," a ti.

Faina Hapta hawnna inkhawm zawhah Mahatma Gandhi pian champha vawi 150-na lawmna hun an hmang leh bawk.

Champhaia CHANEM building-a Faina Hapta hawn inkhawmah khuallian, Champhai North bialtu MLA Dr ZR Thiamsanga chuan, Faina Hapta chu Champhai  fai, thianghlim leh hrisel siam tura hmalakna Clean, Beautiful and Healthy Champhai Project nen a inmil thu a sawi a, "Faina leh changkanna hi kal kawp tlat a ni," a ti.

Inkhawm kaihruaitu, bawrhsap Maria CT Zuali chuan, Faina Hapta chu a hun chhung atan chauh a ni lo a, tàwpsan mai loa kalpui zel a ngaih thu a sawi. Hapta pual hian SP Rex Zarzoliana Vanchhawng kaihhruaiin Kanan Vengah leh additional DC R Lalnghakliana kaihhruaiin Bethel Vengah khawlai tihfai hnatlang neih a ni.

Champhaiah hian veng, pisa, damdawi-in, hotel, restaurant, zirna-in leh hmunhma dangah faina  tehfung hrang hrang hmangin endik tura ruat te'n endik hna an kalpui dawn thu a sawi.

Kolasib-ah chuan Faina Hapta hi bawrhsap Dr H Lalthlangliana'n Venglai YMA Park-ah a hawng a; thu sawiin, "Khaw chhung hmun tam ber hi mimal ram a ni a, mahni ram chin zel ṭha taka kan tihfai chuan khawpui fai kan ni mai dawn a ni,” a ti a, faina lama hmasawn tum ṭheuh turin district mipui a chah.

Inkhawmah hian sorkar department hotu te, VC, YMA, MUP leh MHIP hruaitute an tel a; inkhawm zawhah kawngpui dung an tifai nghal a ni.

Serchhipah chuan Serchhip Auditorium-ah hawn a ni a, khuallian Kumar Abhishek, bawrhsap chuan, Mizote thinlungah fainain hmun pawimawh tak a chang a, khawtlang huapin faina hnatlang neih ṭhin a nih thu sawiin, "Hei hi hnam dangte tan pawha entawn tlak a ni. VC-te pawhin faina hnatlangte hi kalpui zel se a duhawm hle," a ti.

Faina Hapta pual hian UDPA department kaihhruaina hnuaiah Serchhipa street vendor-te'n Serchhip bazar leh New Serchhip bazar an tifai a ni.

Faina Hapta hi Lawngtlaiah chuan bawrhsap Andrew H Vanlaldika'n DC conference hall-ah a hawng. Bawrhsap chuan, faina chu ram hmasawnna tehfung pawimawh leh hriselna leh hlimna nena inzawm tlat a nih avangin, khua leh tuite mawhphurhna a nih thu a sawi a, "District fai ni turin district khawpuia chêngte'n theihtawp kan chhuah a pawimawh," a ti.

Lawngtlaiah hian Faina Hapta pualin Lawngtlai khawpuia veng, pisa, sikul leh thingpui dawr fai zualte thlan a ni dawn a, lawmman chu Republic Day 2021ah sem a ni ang.

Mamitah chuan DC Complex-ah bawrhsap Dr Lalrozama'n a hawng a; thu sawiin, "Mamit hi changkang tura kan duh chuan thianghlimna aṭanga ṭan ni se, thianghlimna leh changkanna hi kal kawp tlat a ni. Faina leh thianghlimna hi veng tinah hian kalpui ni se, keimahni leh kan ṭhenawmte nen thianghlimna rualkhai tak neih ṭheuh i tum ang u," a ti.

Mamitah hian Faina Hapta hawn in­khawm­a telte'n kawt záwl phiat faiin, cleanli­ness drive an nei nghal a ni.

Hnahthialah pawh Market Building Hall-ah Faina hapta hawn a ni a, bawrhsap Vanlalmawia'n hawngin, thu a sawi a, "Fai hi kan tlin a, kan awmna hmun ṭheuh aṭangin hma ila thar ang u," a ti a, Hnahthiala vantlang hmun ṭhenkhatah vantlang inthiarna siam a nih thu leh a ṭul anga siam belh tum a nih thu a sawi.