ECI-in inthlan hun a puan hma chu house to house campaign phal a ni

Mizoram People Forum (MPF) hruaitute leh political party aiawhte July 29, Inrinnia Synod Committee Room-a ṭhukhawm chuan, Election Commission of India (ECI)-in inthlan a puan hma chuan house to house campaign phal an rêl a, 'House to house campaign phal loh' tih chu inthlan puan aṭanga hman ṭan turin an ti.

MPF leh political party aiawhte ṭhutkhawmah hian political party hrang hrang aiawhte an tel a; MPF president Rev. Dr C Chawnghmingliana'n a kaihruai a, MPF general secretary Rev. Lalramliana Pachuau-in MPF hmalakna tlangpui a sawi. Inthlan chungchanga MPF leh political party-te Thawhhona Thuthlung leh hman ṭan hun tur sawiho a ni.

Ṭhutkhawmah hian Thawh­hona Thuthlung an lo pawm tlân tawh chu a pumpuia hman hun atan Thuthlung an pawm ní, February 28, 2023 ni se, an ti a; chutih rualin, Thuthlung no. 2(2)-a 'House to house campaign phal loh' tih erawh chu ECI-in inthlan hun a puan aṭanga hman ṭan ni se, an ti.

MPF president Rev. Dr C Chawnghmingliana chuan, MPF leh political party-te'n thawhhona thuthlung an buatsaih chu political party tinin an pawm a, hming an ziah hnan ngei a nih avangin a hlawhtlin theih nan theihtawp chhuah tlang turin kal khawmte a chah.

MPF general secretary Rev. Lalramliana Pachuau pawhin, Thawhhona Thuthlung chu an party chhungah leh mipuiah a theih ang anga thehdarh tur leh ṭan la turin political party hruaitute a ngen bawk.

Ṭhutkhawmah hian MPF Governing Board member mi 17 bakah, BJP, Congress, Peoples' Conference leh ZPM aṭangin aiawh pahnih ṭheuh leh MNF aṭangin aiawh pathum an tel.