Zirlaibu pe kim thuai turin sorkar phût

ZPM Media, IT & Publicity department chuan sikul ṭan aṭanga thla thum a liam hnuah pawh Samagra Shiksha hnuaia zirlaibu a thlawna semah zirlaite pek kim a la ni lo tih sawiin, zirlaibu sem kim thuai turin Mizoram sorkar an phût. Samagra Shiksha hnuaia zirtirtute hlawh thla thum pek tawh loh chu pe thuai turin an phût bawk.

ZPM Media, IT & Publicity hruaitute hian July 29, Inrinni khan Aizawl Press Club-ah thuthar thehdarhtute an kâwm a; general secretary Eddy Zosangliana Colney chuan, "Samagra Shiksha hnuaia zirtirtute hlawh May, June leh July thla an pe thei lo mek. Mizoram sorkarin zirlaite hmakhua, zirna-in leh zirtirtute a ngaihthahzia a lang chiang hleah kan ngai," a ti.

Eddy Zosangliana chuan, July 27, 2023 khan Samagra Shiksha hnuaia a thlawna zirlaibu semah zirlaite'n an la dawn kim loh chungchang thawktute an zawtfiah tih sawiin, first term exam a zawh thleng pawha zirlai naupangte'n zirlaibu an la dawng kim thei lo chu pawi an tih thu a sawi.

Mizoramah Samagra Shiksha hnuaia zirlaibu dawng tur zirlai 1,00,000 vel an awm mek tih sawiin Eddy Zosangliana chuan, "Zirlai sang télin lehkhabu an la dawng kim lo hi a lungchhiatthlak. Hei hian sorkarin zirna a ngaihthah hle a ni tih a finfiah. Zirlaibu a thlàwna sem tur sem thei lo sorkar kan nei hi a vanduaithlak," a ti.

ZPM General Secretary chuan, academic session 2023-24 atan April 5, 2023-ah sikul ṭan a ni tih sawiin, "July thla tàwp, term exam thleng pawha zirlaite'n zirlaibu an la dawng kim thei lo hi enliam mai chi a ni lo. Sorkarin chhuanlam hrang hrang siam ṭhin mah se, a bul ber chu Mizoram sorkarin zirlaite hmakhua leh zirna a ngaihsak tawk loh vang a ni," a ti a; a rang lama chinfel dan zawng turin sorkar an phût tih a sawi.

ZPM tarlan danin, tun dinhmunah (ráltlân tel loin) pawl 4 Hindi textbook copy 600 velin a daih lo a, pawl 7 Mathematics zirlaibu copy 3,000 vel leh pawl 2 Mizo (Kumtluang 2) copy 1,500 velin adaih lo.

Kum dangah pawh zirlaibu a hun taka pêk a ni ngai lo tih sawiin ZPM Media hruaitute chuan, "Kum tin an dawng tlai ṭhin. A hlâwma pe loin, a zeuh zeuhin an sem ṭhin. Hei hian zirlaite leh zirtirtute tan harsatna nasa tak a siam ṭhin a ni," an ti a; a hun taka naupangte'n zirlaibu an dawn theih nan chhu hma ṭhin se harsatna tam tak sutkian a nih
theih a rinawm thu
an sawi bawk.