Sorkarin ráltlân tan cheng vbc. 5 a pe; Central aṭangin ráltlân tan sum la hmu lo
Mizoram sorkar chuan tun hnai khan ráltlânte tan cheng vbc. 5 a pe chhuak. Hetih lai hian, Manipur buaina vanga sahimna zawnga Mizorama rawn tlanchhiate puihna atan sorkar laipuiah sum dil ṭhin mah se hmuh a la ni lo.
Manipur aṭanga rawn raltlante mamawh zual phuhrûkna atan Home department-in an dil angin Finance department chuan tun hnai khan cheng vbc. 5 a pe chhuak a, administrative approval leh expenditure sanction pawh tihfel a ni tawh. An mamawh ang zela district tin DC hnena pek chhuah tur a ni.
Tunah hian DC-te chuan sum an sên tawhte Home department-ah an thehlut mek a, cheng vbc. 5 aṭang hian an mamawh ang zelin pek a ni ang.
Manipur-a buaina a chhuah aṭanga ni 14-na, May 16, 2023 khan chief minister Zoramthanga chuan Manipur aṭanga Mizorama ráltlânte chhawmdawlna atan sorkar laipuiah cheng vbc. 5 a dil a, ráltlan an luh belh zel avangin May 23 khan cheng vbc. 10 a dil leh bawk. Ṭanpuina tur sum hi sorkar laipuiah nawr ṭhin mah se, sorkar laipui chuan a la rawn pe lo a ni.
Mizoram sorkarin a chhinchhiah danin, Manipur buaina avanga raltlan hi July 28, 2023 thleng khan Mizoramah 12,611 an awm a, chung zinga 9,382 chu relief camp-ah awmin, a bak 2,779 chu an chhungte bêl leh in luahtein an awm.
Mizoramah Manipur aṭanga rawn raltlante tan relief camp 38 siam a ni a; Aizawl district-ah 13, Kolasib district-ah 14 leh Saitual district-ah pakua a awm a ni.