Upa leh natna benvawn neite Zawm tur sorkarin a duang

Mizoram sorkar chuan kum upate leh natna benvawn neite chu an taksa a chak tâwk loh avangin Covid-19 an kai a nih chuan an la na duh bik tih tarlangin, an zawm tur hrang hrang a puangzar.

Sorkar thuchhuah tarlan danin, Covid-19 vanga thi tam ber chu kum upa leh natna benvawn nei sate an ni a; taksa hrisel ṭha leh la naupang deuhte chu hripui an kai a nih pawhin an taksaah harsatna lian tham a thlen lo tlangpui. Hei vang hian kum upa leh natna benvawn neite chu mi dang aia fimkhur zual tura chah an ni.

•    In lamah awm a, lên chhuah loh a ṭha ber

•    Mi inah lên loh a, inléng pawh neih loh a him

•    Lo theih loha mi dang nen inkawm dawn chuan ft. 3 tala inhlata awm tur (duhthusamah chuan ft. 6), mask vuah ve ve (ṭheuh) tur.

•    Chhungkaw member leh mi dangte nen kan titi ho dawn chuan inhlat taka ṭhut a, mask vuah ngei tur a ni.

•    Puipunna, chaw ei khawmna, bazar leh committee meeting-naahte kal loh hrâm a ṭha.

•    In chhungah/ chhungkuaah quarantine/isolation lai te, Covid-19 dona lama thawk te, chhuakvâk nasate an awm chuan anmahni nen inhnaiha awm loh hrâm tur.

•    Uluk takin sahbawn leh tuia kut sil fo tur a ni a; kut sil remchan lohnaah hand sanitizer hman ṭhin tur a ni.

•    Mi dang kan bulah an awm chuan ṭha takin mask vuah ṭhin tur.

•    Hmai, ká, hnár, mitte kut lâwngin khawih loh tur a ni.

•    Mi khawih hnu - chanchinbu, pawisa, lehkha, bungrua, etc. khawih hmain a theih chuan ‘sanitise/disinfect’ ni se.

•    In chhunga thil khawih zin bik - kawngkhâr vawnna, tui herhna, dawhkân, kawngkhâr, etc. a khát tâwka tihfai ṭhin tur.

•    Mi dangte nen zaiho loh tur a ni.