KHAWTHLIR

Thisen pe

July 29, Inrinni khan YMA, Phulpui Branch chuan an din champha vawi 87-na pualin Phulpui Primary School-ah thisen pek an huaihawt a, Zoram Medical College tan thisen unit 68 an pe a, petute mipa 51 leh hmeichhia 17 an ni. KṬP, Dinthar Vengthlang Branch-in Synod Hospital tan an kohhran hall-ah thisen unit 38 pein, petute mipa 28 leh hmeichhia 10 an ni a; UPC (NEI) ṭhalai, Pentecostal Youth Department, Lunglei district pawhin Lunglei Civil Hospital Blood Bank-ah thisen pek huaihawtin, mipa 30 leh hmeichhia pangain thisen unit 35 an pe bawk.

Green Ag sawiho

Lunglei bawrhsap Ramdinliani kaihhruaiin July 28, 2023 khan DC conference hall-ah Green Ag-India project Director-in Lunglei district-a project hnuaia hmalakna a enfiahte sawiho a ni. Director RB Sinha chuan, kut hnathawktute mamawh - thlai chi te, hmanruate hriatsak a, a kaihhnawih department-te nen hmalakna kalpui a nih chuan hlâwk zawka thil thar chhuah theih a beisei thu a sawi.

Airport kawng tlang

Lengpui Airport panna kawngpui, NH chu lirthei tlân tlang theihin tihtlang a ni tawh. Hemi chungchangah hian Aizawl bawrhsap Nazuk Kumar chuan, zan dar 9 aṭanga a tuk zing dar 5 inkarah mihring leh lirthei tan kaltlang phal a nih loh thu a tarlang a; lirthei tlân dan turah sorkar thuchhuak ngaichâng tur leh ngai pawimawh turin mipui a ngen a ni.

Crafts centre

Director General of Police Anil Shukla chuan July 28, 2023 khan Police Headquarters, Khatlaah Mizoram Police Wives Welfare Association buatsaih Crafts Centre a hawng. MPWWA hian police chhungkuate hamṭhatna tur kawng hrang hrang an thawk a, police unit hrang hrangah puanṭhui zirna an kalpui mek a ni.

MLA-in hawng

Aizawl North-I bialtu MLA Vanlalhlana chuan a MLA fund Rs 9,50,000 hmanga sak Chaltlang MUP Rûn chu July 29, Inrinni khan a hawng. In hi a dung ft. 39 leh a vâng ft. 17-a zau a ni. Vanlalhlana hian July 29 vêk khan a MLA fund Rs 6,50,000 hmanga YMA, Durtlang North Branch-in thlanmual in an sak chu a hawng bawk.