Sorkar ṭha zawk din kan tum - Lalduhoma

ZPM leader Lalduhoma chuan July 28, 2023 khan Khawbunga vantlang inkhawmah thu sawiin, sorkar ṭha zawk din an tum thu leh ZPM candidate turte chu eiruknaah an fihlîm ngei a beisei thu a sawi.

Lalduhoma chuan, Pathian hnenah team ṭha, eiru lo tur a dil ṭhin a, Pathianin a pe nia a hriat thu sawiin, "Candidate-te'n kan sawi ngam loh fo, 'Ka eiru dawn lo' tih thu hi ZPM candidate zawng zawngin mipui hmaa sawi fo turin kan inchah a, eirûkna lakah pawh kan fihlim ngei ka beisei," a ti.

Pathianin Mizoram siamṭhat a tum nia a lan thu sawiin, "Pathian rinchhanin ṭawngṭaina nen ram i siam ang u. ZPM hi kan ṭha bik tur a ni a, kan danglam ngam tur a ni. Sorkar ṭha zawk din kan tum a, kalphung thlâkthlenga mipui sorkar din kan tum avangin kan ṭha zawk ngam tur a ni," a ti a; ram siamṭha turin Pathian chakna rin a ngai a, chumi rem zawnga ram politics kalpui a ngaih thu a sawi.

Lalduhoma chuan, kut hnathawktute tan kum khatna aṭangin an che dawn nia sawiin, "Thlai thar lei hi kan sum neih ang angin kan ti ṭan dawn. Chemkawm technology hmanga kan thawh thiam hmangin eizawnna bul kan ṭan a ngai a ni," a ti.

ZPM Leader chuan, "Pawisa tam tak tak a pung awmin tuna sorkar mek hian an pûk a, bat belh miah tawh lo pawh ni ila, tuna kan leiba hi tun aṭanga kum 50-ah kan rûl zo dawn chauh a ni," a ti a; ZPM chuan hmasawnna ringawt an tum a ni lo a, ram politics-ah Pathian ram thlentir an tum thu a sawi.

Mi ṭhenkhatin ZPM pawh sorkar se, engmah an ni tak tak lo ang tiin an sawi ṭhin nia sawiin Lalduhoma chuan, "Kan danglam bik dawn ka ti a ni. Kan party unaute hian ZPM a sorkar chuan an dingchhuak tawh lo ang tih an hlau. Dâwta inbeihna a tam em em a, Pathian duh dan hi kan hlat ṭhin hle. Kan ram politics hi siamṭhat kan tum a, siamṭhat kan duh tak zet a nih chuan a chhungah zuan luh a ngai a, mi ṭha, Pathian mite'n kan ram an enkawl a ngai a ni," a ti.

Inkhawmah hian East Tuipui biala ZPM candidate tura ruat Dr C Lalrammawia pawhin thu a sawi a; ZPM zawm thar voter 1,071 an lawm lut niin ZPM thuchhuah chuan a tarlang.