NH-302 ah maxicab la tlân lo zui zel

NH-302 Lungei-Tlabung kawngpui chhe lutuk vang leh chak zawka siam a nih theihna tura Lunglei khawthlang lama maxicab-te chu July 24, 2023 aṭangin an la tlân lo zui zel a, tun karah pawh an la tlan dawn lo nia thu dawn a ni.

Tarlan tawh angin, NH-302 kawngpui chhe lutuk avangin Lunglei aṭanga khawthlang lama maxicab tlân ṭhinte chuan July 24, 2023 aṭang khan tiamchin awm loin maxicab total bandh an kalpui a, mipui phur turin an tlân lo a ni. Maxicab neitute chu July 28, 2023 khan Phairuangkaiah an inhmukhawm leh a, tiamchin awm loa la tlan loh zui zel an rêl a ni.

Maxicab neitu leh khalhtute chuan, chawlhkar khat chhung an tlan loh chhunga kawng chhe zual laite thawm ṭha tura hnathawh dan chu lungawithlak loh an tih thu an sawi a, kawngpui chu tlânna atan la him loah an ngai a ni.

Lungsen aṭanga thu dawn danin, NHIDCL hnuaia kawng siamtu SRK Constructions chu thlak niin, BRN Infra. Ltd.-in an thlâk a; Lunglei DC pawhin kawng chhe zual lai leh mipui tana harsatna thlen zual laite chu July 28 zing dar 6 aṭanga lirthei eng chi pawh zawh thei tura ngawrh taka siam turin a lo hriattir tawh bawk.

Kawng chhia vang hian khaw pasariha maxicab service 60 vel a ding mek a, chu'ng zinga 30 vel chu Tlabung leh khaw hrang hrang inkara tlân a ni.