Sorkar siam ngei turin hma kan la - MPCC Treasurer

Mizoram Pradesh Youth Congress Committee (MPYCC) chuan 'Sorkar ṭha, kalphung dik' thupuia hmangin July 29, Inrinni zing khan ITI Vengah street campaign an buatsaih a; thu sawitu MPCC treasurer Dr Lalmalsawma chuan, sorkar siam ngei turin hma an lâk thu a sawi.

MPCC Treasurer chuan, MPCC president Lalsawta kaihhruaina hnuaiah dikna a lal a, sorkar ṭha a awm theih nan sorkarna siam ngei tura hma an lak thu a sawi a, "Congress sorkar kal tain bul a ṭan Lokayukta pawh MNF sorkar chuan hna thawk tak tak thei turin an siam duh lo. Lokayukta hian CBI koh luh theihna tur case pahnih an nei tawh a, MNF sorkarin a ko lut ngam lo. Congress party a sorkar leh rualin Lokayukta nasa takin kan thuam chak ang a, a thawh tur dik tak kan thawhtir dawn," a ti.

Tun hnaiah Mizorama mi challang tak takin Congress party an zawm tih sawiin Dr Lalmalsawma chuan, "Ṭhenkhat phei chu sorkara dinhmun pawi­mawh leh hlawh sang tak la reng thei, chu'ng an din hmun kalsana Congress party rawn zawmte an ni. Kan ram, kan hnam leh kan sakhua a him zel theihna tura indona lian tak hmachhawn ngai a awm tih an hriat vang a ni," a ti a; mi challang tak tak an lawm luhte'n Mizoram an fan mek thu a sawi.

MPCC Treasurer chuan, nakkuma Lok Sabha inthlan awm tur chu Mizo hnam leh sakhaw dinhmun sâwi nghîng thei a nia sawiin, "Thlamuang takin kan awm emaw kan tih lai hian kan hnam zia leh kan sakhua thlengin nêkchêpin kan awm mek a, nekchepin kan awm mek tih hre lo tam tak kan awm a, harh a hun tawh," a ti. Inthlanpui awm turah ngaihtuahna fim hmang a, duh thlang sual lo turin mipui a chah bawk.