Minister-in Block Credit Camp a hmanpui

Rural Development minister Lalruatkima chuan tun hnai khan Thingsulthliah Extention Training Centre-ah Block Credit Camp a hmanpui a, self help group (SHG)-te hnenah loan sanction letter leh puanṭhui kháwl a sem.

RD Minister chuan, Mizoram sorkarin thingtlanga chêngte eizawnna leh intunnunna tur a ngai pawimawh nia sawiin, "Ni 100 inhlawhna a hun taka dawn a nih theih nan theihtawp chhuah zel a ni a, state dang entawn tlak khawpin hna thawh mek a ni. Mizoram sorkarin chhungkaw inrêlbàwlna leh eizawnnaa nu pawimawhna a hria a, chak taka hmalak zel a ni," a ti.

Sumdawnnaah elpui an awm zel tih sawiin Minister chuan, "In thil siam chhuah chu zawrh chhuah tlak, ṭha tak, mi dang elpha a ni tur a ni," a ti a; SHG member-te mamawh technology, skill training awm thei ang angah anmahni viltute hriattir zel turin SHG member-te a chah.

Lalruatkima chuan SHG zinga loan la mek leh la tharte chu ṭha taka loan rùl turin a chah a, "Mi rinawm leh rinawm lo tehna ṭha tak pakhat chu an sum pûk an rulh ṭhat leh ṭhat loh a ni. Tuna in loan lak in rulh ṭhat phawt chuan bank lama hotute hian loan pek leh che u an inhuam reng ang," a ti.

Mizoram State Rural Livelihood Mission chief executive officer H Lalchhandami pawhin thu sawiin, "India rama SHG zingah Mizorama SHG-te chu loan chhia (non-performing asset) nei tlem ber an ni," a ti a; an hmingṭhatna tichhe lo tura theihtawp chhuah zel tur leh insurance lak ngai pawimawh turin a chah.

Inkhawmah hian Minister-in Thingsulthliah RD Block hnuaia SHG 21 hnenah Rs 46,50,000 loan sanction letter a sem a; Sesawng Village Organisation-I hnenah puanṭhui khawl paruk a hlan bawk.

Thingsulthliah RD Block hi kum 1974-ah din a ni a, MzSRLM hnuaiah khua pasarih leh member 1,777 awmin, SHG 267 leh village organization 11 a awm a ni.