Minister-in college graduation a hmanpui

Minister of state TJ Lalnuntluanga chuan July 28, 2023 khan Champhai College-in an multipurpose hall-a Graduation an buatsaih a hmanpui.

TJ Lalnuntluanga chuan, zirlai pass tharte chu an hun kal zel turah hmathlir thui tak nei tur te, thawh hreh nei lo tur leh, chhungkua, khawtlang leh ram tana chhawr tlak nih tum turtein a chah a, "Mizoramah mi hausa leh mi retheite inkar a zau zual zel hi a veiawm. Mi dang tan malsawmna ni thei turin taima leh rinawm takin thawk u la, mi harsa zawkte dinhmun cháwi kângtu nih tum ang che u," a ti.

Zirlaite chu a ṭha zawnga social media hmang tura chahin Minister chuan, "Kan zirlai tibuaitu, kan hlawhtlinna dâltu a ni thei tih hriain hman dan tâwk i thiam ang u," a ti a; Champhai district-ah zirna sang zawk a awm theih nan hmalak mek a ni," a ti a; Champhai district-ah master degree zirna a awm theih nan tun hnaiah Mizoram University vice chancellor Prof. Dibakar Chandra Deka a kawm thu a sawi bawk.

Zirlaite thlahna inkhawmah hian Champhai College principal P Lalhmingliana pawhin thu a sawi a; zirlai ti ṭha mi pakua hnenah award hlan a ni.