Durtlang-Sihphir kawng chak zawka siam turin sorkar ngen

ZPM working president K Sapdanga leh ZPM Media, IT & Publicity department hotute chuan July 29, Inrinni khan Durtlang-Sihphir kawng thawm ṭhat mek an tlawh a; K Sapdanga chuan, kawng siam dan leh hna thawh muang lutuk chu ngaimawhawm a tih thu sawiin, chak zawka hma la turin sorkar a ngen.

K Sapdanga chuan, Durtlang-Sihphir kawng zauh chu kum 2018 MLA inthlan dawnah chief minister ni ta Zoramthanga'n a tlin chuan ngaih pawimawh hmasak bera neih a tiam zinga mi a nih thu a sawi a, "RTI Act tlawhchhana zawhna chhannaa a lan dan chuan, Durtlang-Sihphir inkar kawng km. 10.25-a sei siam ṭhatna atan cheng vbc. 46.57 ruahman a ni... Hna erawh an thawk muang hle," a ti.

ZPM Working President sawi danin, Durtlang-Sihphir kawng siam tur hian SLT Infracon Pvt. Ltd, Hailakandi, Assam thlan a ni a, February 24, 2023 khan hna ṭan tur niin, thla 18 chhunga thawh zawh tur a ni a, August 2024-ah zawh tur a ni. Kawng siam tur bul ṭanna chu March 11, 2023 khan Chief Minister-in a hawng a, hna ṭan theih a nih hnuah thla li dáwn chawlhsan a ni.

Contract agreement-ah Mizoram sorkarin kawng siamna senso a pe phawt ang a, sum hmanna utilisation certificate chu kum khatah vawi li (quarterly)-a siamin sorkar laipuiah an thehlut ang a, Central Road Infrastructural Fund-in an rawn pe/rûl ang, tih a ni.

Hna ṭan mai theih loh chhan chu, bul ṭanna tur sum Mizoram sorkarin a neih loh vang a nih hmel ber tih sawiin Sapdanga chuan, "Hetih lai hian, contractor SLT Infracon hi Mizoram sorkar Treasury lamah chuan an che thei hle a, ni khatah bill pakuate an lehlàn theia sawi a ni a, 'The New Kamrula' tiin an hming an lo phuah fiam hial tawh a ni," a ti.

Vaivakawna leimin vangin NH kawngpui khâr a ni tih sawiin K Sapdanga chuan, "Phai lam aṭanga lirthei lian leh tête chu Sihphir lama kal vek tura tih a nih avangin Home Minister hoa ṭhukhawmin Aizawl-Kawnpui via Sihphir chu lirthei veivah theih tura thian fai turin SLT Infracon an hriattir. Lirthei veivâk control turin trafic management a awm leh si lo a, Sihphir khawtlang tlawmngaiin zan rei tak thleng an duty ringawt mai a ni," a ti a; enfiah thuai ṭha a tih thu a sawi.

ZPM Working President chuan, fûrpui a ni mek tih sawiin, "Kawng siam hian mipui tan harsatna a siam nasa ta hle a, hna­thawktute hian hmanrua an chhawp tlem hle. Hna hi a hun taka zawh a nih theih nan Mizoram sorkar hi chak zawkin hma la turin kan ngen a ni," a ti.