Sorkar zirna channel thar hawn a ni

School Education minister Lalchhandama Ralte chuan July 29, Inrinni khan a pisaah Mizoram zirna kaihhnawih tihchhuahna tur telivision (TV) channel pahnih a hawng.

India ram pum tana sorkar laipuia Ministry of Education-in a duan TV channel 200 chuang chu July 29 khan hawn a ni a, Mizoramah pawh hawn a ni. TV channel-te chu India ram puma zirlaite'n zirna inang leh intluktlang an dawn theihna tura ruahman a ni a, One Class One TV channel tih hmanga duan a ni.

Mizorama TV channel pahnihte chu - elementary level tan Zirna Kailawn (Learning Ladder) leh secondary level tan Zirna Lamtluang (Learning Pathway) tih a ni. DTH TV kaltlangin PM eVIDYA MZ128 leh PM eVIDYA MZ129 bakah, youtube lamah SCERT Mizoram Zirna Kailawn-Learning Ladder leh SCERT Mizoram Zirna Lamtluang-Learning Pathway-ahte live a tihchhuah ṭhin a ni ang.

Mizorama TV channel pahnih hi state coordinating agency atana ruat State Council of Educational Research and Training (SCERT) kutah a awm a; tihchhuah tur leh a kaihhnawih thil hrang hrangte an kutah awmin an buaipui dawn a ni.

Minister Lalchhandama Ralte chuan, zirna tihchangtlunna atana TV channel pahnih Mizoramin a neih thar chungchangah, "Mizorama zirlai zawng zawng leh zirtirtute'n an hlut thiam a, ṭangkai taka an hman ngei ka beisei," a ti.