Emerging NE - Smart Solutions-ah Dy. Chief Minister

Associated Chambers of Commerce of India (ASSOCHAM) chuan October 1, Ningani tlai dar 4:15 khan Emerging North East - Smart Solutions an buatsaih a, deputy chief minister Tawnluia khualzahawm niin, video conferencing kaltlangin thu a sawi.

Tawnluia chuan, Mizoram chu Asia chhimchhak ram hnaia awm a nih avangin India tan state pawimawh ber zinga mi a nih thu a sawi a, "Mizoramin tun hnaiah hmasawnna tam tak a nei. NITI Aayog-in June 2019-a Health Index a tihchhuahah Mizoram chu India ramah a sang ber dawttu a ni a, tehna hrang hrangah state hrisel leh hnathawk thei tam tak awmna a ni tih a entir," a ti.

Dy. CM sawi danin, NITI Aayog buatsaih Export Preparedness Index, 2020-ah Mizoram chu 23-na a ni a; Department for Promotion of Industry and Internal Trade (DPIIT)-in a tarlan danin, Foreign Direct Investment (FDI)-ah Mizoram chuan April 2000 aṭanga March, 2019 chhungin US dollar 116 million a chhûng lut a ni.

Mizoram chu hmarchhak state zingah thei thar chhuak ṭha state a nih thu sawiin Tawnluia chuan, "Mega Food Park hawn a ni tawh a, Agriculture leh Horticulture thlaiah nasa takin hma a sawn a ni," a ti.

Emerging NE - Smart So­lutions hi session hniha then a ni a; session khatnaah hian NABARD managing director SN Mallick leh Oil Palm Plantation, Godrej Agrovet CEO  Nasim Ali ten thu sawiin, session hnihnaah Sikkim aṭangin ASSOCHAM report tlangzarhna hun hman a ni.