KHAWTHLIR

Naktuk, Pathianni hian Union Public Service Commission chuan Civil Services (Preliminary) Examination 2020 a buatsaih dawn a; Aizawlah pawh exam tur niin, Mizo High School, Mizo HSS leh Hrangbana College-te chu exam-na tur a ni. Exam turte tan Mizoram sorkarin bus a ruahman dawn a, zing dar 7-ah Kulikawn leh Bawngkawn aṭanga chhuakin, e-admit card hmangin pawisa ngai loa chuan theih a ni ang.

Taitesena Group YMA, PWD leh Gayatri company-te chu nimin khan Tuidam leh Dárlâk inkar kawngpui (NH-44A) chhe siamin an hnatlang. Hnatlanga thawk chhuakte chuan Sabual lui aṭanga Darlak lam kawng thar péng, km. 3 vela thui chu lungin an hnawh a, lung chu Gayatri company-in an tum. Hnatlangte ei leh in senso atan Hachhek bialtu MLA Lalrindika Ralte-in Rs. 10,000, Dampa bialtu MLA-in Rs. 4,000 leh mimal ṭhahnemngaite'n pawisa an thawh a ni.

PHE engineer-in-chief Lalmuanzova chu secretary-ah a kaisan avangin E-in-C mawhphurhna chu tun hnai khan C Lalremsiama hnenah a hlân. MES aṭanga secretary Valbuanga chu September thla tàwp khan pension-in a chhuak bawk.

Aizawl DC chuan thupek chhuahin, Covid-19 laka mipui himna atan DMR department thuchhuak angin, Aizawl khawpui chhungah phalna nei loa mi panga aia tam awm khawm khap a nih thu a puang. District danga DC-te pawhin an khawpui bik atan mi panga aia tam awm khawm khapna thupek an chhuah bawk. Thupek hian October 31, 2020 thleng a huam dawn a ni.

State Referral Hospital-ah nimin tlai thleng khan Covid-19 vei vangin mi 11 enkawl mek an ni a, ICU-ah mi pathum leh Isolation Ward-ah mi pariat an awm. SRH-ZMC Bulletin tarlan danin, ZMC-a enkawlte chu mipa panga leh hmeichhia paruk, kum 16-74 inkar, Mizo pasarih leh hnam dang pali an ni a; ngaihtuahawm an awm lo.