State university nei tura hmalak rawtna Council of Minister ṭhukhawmin an pawm

Council of Minister chu nimin khan chief minister Zoramthanga kaihhruaiin CMO Cabinet Meeting Room-ah an ṭhu a, Mizoramin state university a neih theih nan hmalak an rêl bakah, Mizoram sorkara doctor-te'n lungawi lohna an lo lantir tawhna Mizoram Health Services siamrem rawtna an pawm.

Cabinet meeting-ah hian agenda eng emaw zat awmin, agenda 13 chu an pawm a; New Education Policy, 2020 duh dan angin Mizoram sorkarin state university a neih theih nan hmalak an rêl. Thu dawn danin, NEP 2020 hnuaiah hian kum 2035-ah chuan college-te chu central university hnuaiah an inziak lut (affiliate) thei tawh dawn lo a, state university-ah chauh an inziak lut thei tawh dawn a; hei vang hian kum 2035 thlen hmain Mizoramin state university a neih ngei a ngai a ni.

Cabinet hian DPAR aṭanga thu lut, 'Restructuring of Mizoram Health Services and Grievances of the Mizoram Government Doctor Association' tih chu an pawm a; HFW department aṭanga thu lut, Mizoram State Medical Rules, 2013 an pawm bawk.

Mizoram Health Services and Grievances of the MGDA siamrem rawtna hi Mizoram sorkara thawk doctor-te service siamremna a ni a; MHS Restructuring Committee-in rawtna a siamte chu Cabinet hian a pawm nia thu dawn a ni.

MHS Restructuring Committee rawtna tihpuitlin phûtin MGDA member-te chuan kumin July 10-11 chhung khan badge dum bel an tum bakah, July 13-15 chhung a huhoa chawlh lak an tum a; July 10-a badge dum an bel ṭan hnuah, an thil phût chu July 2023 chhunga tihhlawhtlin sorkar hotute'n an tiam avangin lungawi lohna lantir an titawp nghal a ni.

Cabinet meeting hian Health & Family Welfare department hnuaiah Nursing Directorate siam rawtna an pawm bawk.

CABINET THU PAWM DANGTE

◆ Proposal for introduction of the Mizoram Protection of Interest of Depositors (in Financial Establishment) Rules, 2023

◆ The Mizoram Goods & Services Tax (Amendment) Bills, 2023

◆ Proposal for Amendment of the Mizoram Rights of Children to Free & Compulsory Education Rules, 2011

◆ The Aizawl Municipal Corporation Building (Amendment) Regulation

◆ Draft of the Mizoram Municipalities (Amendment) Bill, 2023

◆ The Mizoram Consumer Protection (State Council & District Council) Rules, 2023

◆ Proposal for implementation of the Pharmacy Practice regulations, 2015

◆ Draft Rules of Zoram Medical College

◆ A proposal for shifting from subjective evaluation in personal interviews to written exam to assess Mizo language proficiency as a qualifying criterion for entry into Government Service

◆ Draft of the Mizoram telecom Infrastructure (Amendment) Policy, 2023