Myanmar ráltlân chhinchhiah ṭha dawn

Myanmar ram chhung buaina vanga sahimna zawnga Mizorama rawn tlânchhiate chu sorkar laipuia Ministry of Home Affairs (MHA) thu angin chhinchhiah ṭhat leh a ni dawn.

Home department aṭanga Vanglaini thu dawn danin, April 18, 2023 khan MHA chuan Mizoram leh Manipur sorkar aiawhte New Delhi-ah an ko a; ram dang aṭanga ráltlân rawn lutte biometric enrolment ti tura hriattirin, hmanruate an hawhtir nghal a ni.

Biometric enrolment tihna tur khawl neih saah siamrem ngai a awm avangin siamṭhat a ni a; chutih laiin, tun hnaiah MHA Joint Secretary a rawn zin a, Myanmar ráltlânte chhinchhiahna tura belh ngai leh paih ngaite a rawn hrilh a ni.

Myanmar ráltlânte chhinchhiah tur hian inzirtir leh inhrilhfiah ngaite inzirtir a ni tawh a, district pakhat an la inpeih loh deuh avangin hna ṭan theih a ni lo. Ráltlânte chu an kutzia (finger print), thlalak leh an nihna (identity)-te chhinchhiah a ni ang.

Home department hotute chuan, Myanmar aṭanga rawn ráltlânte chu an rawn luh tirhin chhinchhiah an nih thu an sawi a, "Thil thar tehchiam a ni lo. MHA-in duh dan an nei a, chu ang chuan kan chhinchhiah ṭha leh dawn tihna a ni," an ti.