CAU, Imphal-a Mizo zirlai hmun danga sawn turin MSU-in Governor an ngen

Nimin khan Raj Bhavan-ah Governor Dr Hari Babu Kambhampati leh Mizo Students' Union Gen. Hqrs hruaitute an inkâwm a; MSU hruaitute chuan Central Agriculture University (CAU), Imphal-a Mizo zirlaite harsatna tawh thu thlenin, chinfelsak turin an ngen.

MSU hruaitute chuan, CAU, Imphal-ah Mizoram aṭangin zirlai 39 an awm mek a, chu'ng zinga mi 12 chu final year leh zir zo tawh tur an nih thu leh, mi dang 28 chu August 2, 2023 ral hmain admission document (hard copy)-te CAU, Imphal-ah thehlut tura tih an nih thu an sawi.

Zirlaite chu exam hmachhawn nghal tur an nih thu leh tun dinhmunah Mizoram aṭanga Imphal-a kal a him loa an hriat thu MSU hruaitute chuan an sawi a; an zirna a bahlah loh nan Mizo zirlai 28-te chu state dang zirna-ina sawn (transfer) an nih theih nan hma laksak turin Governor an ngen a ni.

State dang zirna-ina insawn chuan hun a duh rei theih avangin, August thlaa admission ti tur leh exam hmachhawn mai turte'n online hmanga an tih theih nan hma lâkpui thuai turin Larsap an ngen bawk tih MSU chuan an tarlang.

MSU chuan, an thu thlente Governor-in ṭha takin a lo dawngsawng a, hma a lak nghal thu sawiin, "CAU vice chancellor Dr Anupam Mishra a be nghal a, August 2, 2023-ah Aizawla MSU hruaitute leh zirlaite nen hmaichhana indawr a nih theih nan min ruahmansak nghal a ni," an ti. Larsap hmalaknaah an lawm thu an tarlang bawk.