Rilru ná tlem azawng awm mah se, ZPM party-in harsatna kan nei lo - ZPM President

ZPM president Lalliansawta chuan, Assembly inthlan turah seat chan loh vanga rilru ná tlem azawng awm mah se, an party-in harsatna an nei lo niin a sawi a; kalphung thar, mipui sorkar din an tum chu dinpui turin Mizoram mipui a sáwm.

Lalliansawta hian nimin khan an party pisaa inkhawmah thu sawiin, "Candidate 39 kan puang tawh a, heng ho zat aia tam fé seat beisei, chang ta lo an awm. Seat chan loh vanga rilru ná tlem azawng an awm a, tunah chuan party-in harsatna kan nei tawh lo," a ti.

ZPM President chuan, politics chu khuai ràu ang deuh a nih thu sawiin, "Kalna lam tur pan tur zawnga thlawk, hnung lam hawi záwnga thlawkte an awm a, mahse, an liam duak a, an awmna tur lam an pan fel leh vek ṭhin. Zingah ní a chhuah dawnin a chhuahna lai tur a sen phût mai a, hai rual a ni lo. Chutiang chu ZPM dinhmun a ni. Ní a chhuak ṭêp a, ni chhuak turin káwl a chhun eng sút ang maiin ZPM sorkar hun tur kan thlir mek a ni," a ti a; kalphung thar, mipui sorkar an din theih nan thawhpuiah Mizoram mipui a sáwm a ni.

Khawṭha tak pawh khawchhiain a tihbuai cháng a awm fo tih sawiin Lalliansawta chuan, "Keini chuan beisei leh ṭawngṭai chungin kan dil a, rim takin kan thawk mek. Chaponain hmun a chang tur a ni lo a, kan candidate-ten an thawk rim em em a, sorkar kan tumnaa kan innghahna lian ber pakhat chu thawhrimna a ni," a ti.

ZPM President chuan, an candidate-te tihhautak loh nan ZPM block leh unit hrang hrangte sum tuakin an inhlawh ṭhin tih sawiin, "Mi tam takin candidate-te sum an dil ṭhin a, hei hian inthlan senso a ti hautak em em ṭhin. Kalphung tharah erawh chuan diltu ni loin petu zawk kan ni ta mek a, a ṭha zawnga inthlanna kalphung her danglamna ni turah ka ngai," a ti a; ZPM block leh unit-te'n candidate-te suma an ṭanpui zawk ṭhin thu a sawi.