School Education leh NCERT-in MoU ziak
Mizoram sorkara School Education department leh National Council of Educational Research and Training (NCERT) chuan tun hnai khan National Education Policy, 2020 kum thum tlinna pualin PM eVIDYA DTH TV channel chungchangah thuthlung, memorandum of understanding (MoU) an ziak.
Thuthlung hi Pragati Maidan, New Delhi-ah ziah a ni a; Mizoram sorkar aiawhin School Education secretary Dr Lalzirmawia Chhangte-in hming a ziak. MoU hi Ministry of Education-a minister of state pathum - Annapurna Devi, Dr Rajkumar Ranjan Singh leh Dr Subhas Sarkar te hriatpuia ziah a ni.
Inremna thuthlungah hian sorkar laipui chuan TV channel-te a thlâwna state-te a pekna tur te, state-te chu TV channel chhuah tur hrang hrang, zirlaite tana ṭangkai tur leh zirlaibu mil zirna puitu siam tura intiamkamna a tel.
India ram puma zirna puala Ministry of Education-in a duan TV channel 200 chuang chu July 29, 2023 khan a ruala hawn a ni a; TV channel-te chu India rama zirlaite'n zirna inang leh intluktlang an dawn theihna tura ruahman niin, One Class One TV channel tih thupui hmanga siam a ni.
Mizoram chuan TV channel pahnih a nei dawn a, elementary tan 'Zirna Kailawn - Learning Ladder' tih leh secondary tan 'Zirna Lamtluang - Learning Pathway' tihte a ni.