KHAWTHLIR

Thisen pe

Ebenezar Medical Center chuan an din champha vawi ngana lawm nan nimin khan thisen pek an huaihawt a, Civil Hospital, Aizawl tan thisen unit 101 an pe. Thisen petute mipa 56 leh hmeichhia 45 an ni.

Bungrua hlân

UDPA department chuan nimin khan Lawngtlaia Observation Home hnenah Deen­dayal Antyodaya Yojana-National Urban Livelihoods Mission scheme hnuaia Shelter for Urban Homeless (SUH) aṭangin water filter leh plastic drawer an hlân.

Siaha inbuatsaih

Siaha district election officer Lalhmunsanga Hnamte, bawrhsap kaihhruaiin nimin khan DC meeting hall-ah kumina MLA inthlanpui inbuatsaihna atan 'Identification and Assessment of Vulnerable areas/Polling station' chungchang sawiho a ni. Sector magistrate-te chu pink polling station leh model polling booth atana thlan turte leh vulnerable areas/polling station-te zawng chhuak tura tih an ni.

Zirlai lawmpui

MSU District Head­quarters, Champhai chuan nimin khan Champhai College multipurpose hall-ah zirlai ti ṭhate lawmpuina an buatsaih a, under graduate zo thar mi 104 hnenah lawmpuina an hlân. Khuallian P Lalhmingliana, Champhai College principal chuan "Zirlaite hi kan tuarchhel tur a ni a, tawrhchhelna tel lo chuan hlawhtlinna a awm thei lo," a ti.

Rúlhût hlo pek rûnpui

National Deworming Day State Coordination Committee chu nimin khan an chairman Dr Eric Zomawia, NHM mission director pisaah an ṭhukhawm a, Mizoram puma rúlhût hlo pek rûnpui vawi hnihna, kumin August ni 10 leh ni August 17-a neih dan tur an rêl. Rúlhût hlo pek rûnpui hi Health department district tina kalpui turin an rél a; kum 1-19 inkarte kim taka pek an nih theih nan theihtawp chhuah turin thawktute an inchah.