Commonwealth Parliamentary Association Khawmpuiah Assembly Speaker a tel

Commonwealth Parliamentary Association (CPA), India Region Zone-III Annual Conference vawi 20-na, July 28, 2023-a Shillong-a ṭanah Legislative Assembly speaker Lalrinliana Sailo a tel a, Manipur tualchhung buaina chinfel a nih theih nan theihtawp chhuahpui turin CPA Zone-III member-te a sáwm.

Inkhawmpui hi vawiin thleng neih tur a ni a; thupui chu 'Natural disasters and strategies for management with special reference to North East India' tih leh 'Regional connectivity to bring North East Region at par with mainland India' tihte a ni.

Lalrinliana Sailo chuan thu sawiin, Manipur tualchhung buaina avangin mi tam takin Mizoram an pan tih a sawi a, "Mizoram sorkar chuan a theih ang angin ráltlânte a tuamhlâwm a, Zo hnahthlak unaute harsatnaah hian Mizoram sorkar chu a tlânchhe dawn lo," tiin, Manipur buaina chinfel a nih theih nan theihtawpa pui turin CPA Zone-III member-te a sáwm.

India hmarchhak state-te chu khuarel chhiatna hrang hrangin a nuai ṭhin tih sawiin Lalrinliana chuan, "Kan ṭanrual a ngai. United Nations Sustainable Development Goals signatory kan nih angin, hmasawnna kawng kan zawhnaah hian tun hun atan mai ni lo, chhuan la awm leh zel turte ngaihtuah chunga hmasawnna hna thawh a ṭul. Chutianga hma kan lak chuan kan ramngawte awmze nei takin kan humhalh zel thei dawn a ni," a ti.

Assembly deputy speaker H Biakzaua pawhin thu sawiin, "Hmarchhak bialin India ram hmun dang tluka hma a sâwn theih nan intlawhpawhna ṭha kan neih a ṭul," a ti a; inkalpawhna ṭha a awm theihna tura sorkar laipuiin hma a laknate chuan hmasawnna a thlen tur thu a sawi.

CPA Zone-III Conference-ah hian Mizoram Assembly secretary Lalhmahruaia Zote leh Mizoram sorkar hotu dangte an tel. February 6-8, 2024 khian Aizawlah CPA India Region Zone-III Executive Meeting neih a ni ang.