MNF-in candidate tur an tifel ṭan mek

MNF Nomination Committee tun hnaia ṭhukhawm chuan, kumina MLA inthlanpui awm tura an party candidate tur ṭhenkhat an tifel nia thu dawn a ni.

Thu dawnnain a tarlan danin, Rajya Sabha MP ni lai K Vanlalvena chu Aizawl South-I biala ding tura tih a ni a, MLA ni lai C Lalsawivunga, ZPM nen an inkhing ang. Aizawl South-I ah hian MNF aṭangin mi hrang hrang hming a lan hnuah, a lang lo ber K Vanlalvena a ding dawn a ni.

Saiha bialah chuan Mana Auto­nomous District Council-a member of district council ni lai HC Lalmalsawma Zasai a ding dawn a, Lawngtlai West-ah chuan Lai Autonomous District Council-a chief executive member ni lai V Zirsanga a ding dawn. West Tuipui bialah chuan Prova a ding dawn a, Aizawl North-I ah minister ni lai leh Ṭawi bialtu MLA ni mek R Lalzirliana a ding ang.

AMC corporator ni lai pahnih - mayor Lalrinenga Sailo leh executive councillor B Lalawmpuii te pawh an dinna tur bial tihfel a ni tawh. Lalrinenga Sailo hi Ṭawi bialah a ding dawn a, Robert Romawia Royte-in a chhuahsan tur Aizawl East-II ah B Lalawmpuii a ding dawn.

MNF hian a hmain ZPM leader Lalduhoma bial Serchhipa ding turin J Malsawmzuala Vanchhawng an lo puang tawh a, chumi hnuah Hachhek biala ding turin Robert Romawia Royte puan leh a ni. Aizawl North-II a ding tur pawh tihfel tawh a ni a, Vanlalsawma (Sawmtea), Ramhlun Venglai a ding dawn niin an sawi.

Hrangturzo bialtu MLA Lalchamliana, minister chuan kumin inthlanpuiah MLA chuh tawh loh pawi a tih loh thu a lo sawi tawh a, ding leh tura nawrtu erawh an awm thoa hriat a ni. Hetihlai hian, a phatna hi nomination committee chuan an pawm tawh nia thudawn a ni. Hrangturzo bialah hian bial mi leh sa Lalremruata Chhangte, MNYF vice president hlui hming a ri ring viau.

MNF hian MLA an neih lohna biala ding tur an tifel thawkhat tawh a, hriat theih chinah Palak, Tuichawng, Thoráng, Aizawl South-I, Aizawl West-III biala ding tur an la tifel lo deuh nia thu dawn a ni.