Cooperative society chungchang sawiho

Champhai District Cooperative Development Committee (DCDC) chu an chairman James Lalrinchhana, DC kaihhruaiin nimin khan DC conference hall-ah an ṭhukhawm a, cooperative society-te dinhmun leh hmalakna turte an sawiho.

Cooperative officer B Lalchhanhima'n Champhai district-a cooperative society dinhmun tlangpui a tarlang a; Champhai district-ah Pradhan Mantri Jan-Aushadhi Yojana din a nih theih nan hmalak ni se, an ti. Ran vulh, a bikin bawng vulh leh sangha khawi lama cooperative hnuai hmalak theihte leh bank-te nena ṭanrual theih dante zir chian ni se, an ti bawk.

Ṭhutkhawma tarlan danin, Khawzawl leh Saitual district hmun ṭhenkhat huam telin Champhai district Cooperative office hnuaiah khaw 84 a awm a, cooperative society 195, large area multipurpose society pakhat leh district cooperative society pahnih an inziak lut tawh. Society 198 zinga 132 chu a nung mek a, 66 chu an nung tawh lo thung.