Tun term chhungin Assam Rifles hmuna mimal ram awmte cancel fel hman beisei; Surveyor-te pawisa pek loh tur - LRS Minister

Land Revenue & Settlement minister Lalruatkima chuan nimin khan Aizawl Press Club-ah thuthar thehdarhtute kawmin, tun term chhungin Aizawl khawpuia Assam Rifles hmuna mimal ram awmte cancel fel hman a nih a beisei thu leh surveyor-te pawisa pek loh tur a nih thu a sawi.

Zawhna chhangin Lalruatkima chuan Assam Rifles hmuna ram nei ṭhenkhat chuan sorkarah an ram an surrender thu a sawi a, "A rawn surrender tute chungah kan lawm takzet. Ram neitu ṭhenkhat erawh anmahni hmuh zawh an ni loa, chanchinbu kaltlangin an ram cancel a nih lohna chhan tur kan zawt vek. An address hriat loh hi mi pariat vel an ni," a ti.

LRS Minister chuan AR hmuna mimal ramte cancel tura hmalak mek a nih thu sawiin, "Tun term chhungin kan cancel hman kan beisei. Mi pahnih/pathum erawh court-ah an kal mek thung," a ti a, court-a kal mekte ram erawh cancel theih a la ni dawn rih lo tih a sawi.

Ram teh a nihin surveyor-te pawisa pek an ni ṭhin ni a sawi a awm thu sawiin Lalruatkima chuan, "A dikin ka ring. Surveyor-te hi pawisa pek tur an ni lo, ram awmna chin an hriat loh avangin hruaite chu thil àwm a ni tho. Tin, thingpui lo pekte a àwm a, pawisa erawh pek tur a ni lo," a ti a, mipuite chu surveyor-te pawisa pe lo turin a ngen.

LRS Minister sawi danin, an department hian kum 2018 aṭanga July, 2023 chhungin house pass - 4504, shop pass - 19, periodic patta - 853 leh land lease - 935 an pe chhuak. Land lease zinga 415 hi departmental land lease niin a dang 520 hi pawl leh mimal hnena pek a ni.

Cadastral LSC hi 13,221 pek chhuah a ni a, house pass aṭanga LSC-a siam hi 14,542 niin, periodic patta aṭangin garden LSC-ah 266 leh a ni.

Mimalin ram pass an neih an pass huam chhung bak an lo enkawl vang emaw, pass lo inpekthuah emaw, thildang vang emawa ram chungchanga intihbuaina a awm ṭhin. Heng intihbuaina (dispute case) hi 1,504 chinfel a ni.

Tuna LRS department-in dan an hman hrang hrangte hi mipuite leh sorkar tana a samkhai zawkna atan siamṭhat a ni.

LRS Minister thusawi ṭhenkhat

▶ The Mizoram (Restriction on use of Transferred Lands) Act 2002 chu siamṭhat a ni a, dan bawhchhiate jail-a tan tir theihna provision paih a ni.

▶ The Indian Stamp (Mizoram Amendment) Act, 2023 hmangin Stamp Act hi siam rem a ni. Conveyance fee(Stamp Duty) rate hrang hrang awm thin chu 1% a hrut rual a ni.

▶ Sorkar project leh development pawimawh a awmin ram lak (acquired) a ngai ṭhin a, land acquisition hi LRS dept.-in a buaipui ṭhin. Amaherawhchu, Railway atan leh national highway atan bik hi chuan act hran hmanga acquire a nih ṭhin avangin Central Ministry lamin an buaipui ṭhin.

▶ Tunah hian oil depo tan Sihhmui-ah ram lak turin buaipui mek a ni.

▶ Post ruak hrang hrang 72 hnawhkhah a ni. Chungte chu promotion-in 51, MR/PE regularization-in post 9, direct-in post 11 leh compassionate appointment 1.

▶ Tunah hian surveyor 15 lak phalna neih a ni a, exam conduct a la ni lo, a hma thei ang a conduct tura buaipui mek a ni.

▶ Recruitment Rules siamṭhat ngaite ennawn niin, joint director of survey, assistant director of survey/assistant survey officer, surveyor-I, surveyor, revenue assistant-te Recruitment Rules siamṭhat a ni.

▶ Cartographer-I post pakhat siam belh a ni.

▶ District thar pathum - Hnahthial, Saitual, Khawzawlahte settlement officer, surveyor-I leh surveyor dah an ni.