India ramah a thlawna thisen pek ṭhat lamah Mizoram 6-na a ni
Mizoram State AIDS Control Society (MSACS) leh Association for Voluntary Blood Donation (AVBD) chuan nimin khan Kolasib-a IPR Conference Hall-ah 'Training of Blood Donor Motivators' an buatsaih. Mizoram chu India ramah a thlawna thisen pekah state ti ṭha parukna a nih thu tarlan a ni.
Thisen pek chungchang zirhonaah hian Kolasib district-a kohhran pawl hrang hrang ṭhalai pawl leh tlawmngai pawl hruaitute an tel a; AVBD Gen.Hqrs secretary (publicity) K Zothanpara'n kaihruaiin, Kolasib AVBD secretary Lalṭanzuala'n thisen peka an dinhmun tlangpui a sawi.
AVBD Gen.Hqrs president C Lalnunnema, Kolasib Blood Centre medical officer Dr Janet Zoremnghaki, MSACS assistant director pahnih F Lalmuanpuii leh Lalhmingliani Pachuau ten a thlawna thisen pek chungchang leh a kaihhnawih thil pawimawh hrang hrang an zirtir a; zawhna leh chhanna leh sawihona hun hman a ni bawk.
Zirhonaah hian Mizoram chu India ramah a thlawna thisen pekah state ti ṭha parukna a nih thu tarlan a ni. India ram pum dinhmun tarlanna hnuhnung ber, 2020-21 dinhmun ang chuan, Mizorama a thlawna thisen pek (voluntary donation) percentage chu 90% a ni a; Mizoram aia ti ṭha state-te chu - Maharashtra (99%), Tamil Nadu (99%), Punjab (96%), Haryana (93%) leh Karnataka (93%)-te an ni.
Hetih lai hian, sorkar kum liam ta, 2022-23 chhung khan Mizoramah thisen unit 37,419 pek niin, chung zinga unit 34,252 chu pek bik nei loa a thlawna pek a ni a, 91.54% a ni.