MNF hi Delhi-ah chuan an NDA hle a ni - Mizoram BJP

Mizoram BJP spokesperson K Laldinthara chuan nimin khan Aizawl Press Club-ah thuthar thehdarhtute kawmin, MNF chu Delhi-ah chuan NDA em emah a puh a, ZPM pawh NDA-a tel ve châkah a puh bawk.

K Laldinthara chuan MNF Party President-in NDA chhuahsan mai a pawi ti lo niawmin chanchinbuten an ziak tih sawiin, "A invaukhan ve naah Mizoram BJP chuan kan ngai mai. Pu Robert Romawia Royte-in NEDA/NDA chhunga tel an nih thu a tlangau pui reng thung. MNF thu leh ui bengah hlin tur a awm lo e. Thu chiang erawh chu, MNF MP pahnihte hi Parliament Ruling bench-ah an ṭhu tih hi a ni," a ti.

Lehlama awr sen leh lehlama awr dumah MNF puhin BJP Spokesperson chuan, "MNF hi Delhi-ah chuan an NDA em em a, Mizoramah chuan BJP beitu an ni. Union Minister rawn kalte hi Mizoram minister-te'n kan State President recommendation ziahsak turtein an ngen ṭhin," a ti a, MNF chu mipui bum kual tumah a puh.

K Laldinthara sawi danin, Mizoram BJP MLA neih chhun Dr BD Chakma chu hnam thil vangin ruling lamah ṭhuttir a ni lo. Chutiang ni lo se, MNF-ten ruling lamah an ṭhuttir ang.

BJP Spokesperson chuan, ZPM hotupa-in NDA zawm a duh thu voice record-ah hriat tur a awm tih sawiin, "NDA/NEDA a zawm theih nan hma pawh a la ngei niin social media lamah tarlan a ni tawh. Mizoram tualṭo party-te hian NDA/NEDA zawm tumin nula hmelṭha rîm takin BJP hi an rawn rîm mek zawk," a ti.

Kumin MLA inthlanah BJP tel lo sorkar Mizoramah a piang dawn lo nia sawiin K Laldinthara chuan, "Mizoram politician-te hian BJP hi an hua-in an do tak tak lo a, BJP lian chho mek ngai ngam loin mipuite min sawi ṭhaih mai mai ṭhin a ni zawk," a ti a; political leader-te hian BJP chu thawhpui an duh em em zawk niin a sawi bawk.