National Protest Day zawm turin tualchhung kohhrante ngen

Mizoram Presbyterian Kohhran chuan thuchhuah siamin, Dalit zinga Kristian leh Muslim-te Scheduled Caste-a chhiar tel ve theih lohna dan duh lohna lantir nan August 10, 2023-ah National Protest Day zawm ve turin tualchhung kohhran tinte a ngen.

Mizoram Synod chuan, Dalit and Tribal/Adivasi Concerns, National Council of Churches-in India, Catholic Bishop's Conference of India office leh National Council of Dalit Christians aṭanga ngenna an dawng tih a tarlang a; kum 1950-a India President-in Dalit zinga Kristian leh Muslim-te Scheduled Caste-a chhiar tel ve theih lohna dan a tihchhuah chu India danpui Article 14, 15, 16 leh 25 kalh a nih thu te, he dan duh lohna lantir nan hian August 10, 2023 khian National Protest Day neih tur a nih thute a tarlang.

Kohhran tinte chu August 10, 2023 zing ṭawngṭai inkhawmah National Protest Day chu zawmve turin Synod chuan a ngen nghal bawk.