Ram kaihruaitu tur thlang fimkhur turin mipui chah

Nimin khan Kolasib Synod conference hall-ah Congress Workers' Meet buatsaih a ni a, an hun hmanpuitu MPCC vice president Lal Thanzara chuan kan ram kaihruaitu tur thlan chungchangah mipuite chu fimkhur turin a chah.

Lal Thanzara chuan mi ṭhenkhatin 'politics ka ngaihsak peih lo, ka tel vena chi a ni lo an ti ṭhin' tih sawiin, "Mah se, politics ṭha lo avanga tawrhna hi kan zavaia chungah a thleng thei. Politics kal sual avangin kan ram chu kum 20 chhung a buai a, thlarau mite pawh biak-inah an inkhawm thei bik lo. Kan politics dik lo avangin kan ram economy a tla chhe mek a, a tuartute chu mipui tho kan ni. Chuvangin mipuite hian politics ngaihven a, tute hi nge ram hruaitu ṭha tih hi kan zirchian a ngai," a ti.

MPCC Vice President chuan central lamah All India Congress Com­mittee-te thlazar hnuaiah regional party hrang hrang inzawm khawmte chuan BJP sorkarna ti tawp turin ṭan an la chho mek tih sawiin, "BJP do duh ho zawng Congress party-in a kuah khawm mek a ni. Congress Party chu nakkum India ram inthlanpui lo awm turah kan sorkar ngei dawn," a ti a, hnam hnuaihnung leh sakhaw tlem zawkte tan Congress party chu himna kulhpui a lo ni tawh ṭhin thu a sawi.