MPYCC-in street campaign an buatsaih

Mizoram Pradesh Youth Congress Committee (MPYCC) chuan nimin khan 'sorkar ṭha leh kalphung dik' tih thupui hmangin Sesawng Bazar-ah street campaign an buatsaih a, thusawitu MPYCC president Laltawnliana chuan party ṭhenkhatin sum chakna hmangin vote lei an tum dawn niin a sawi.

MPYCC President chuan, "Party ṭhenkhat chuan sum chakna hmangin i vote kha rawn lei an tum dawn, in chhungkua rawn lei an tum dawn. Ṭhenkhat chuan an ṭawngkam thiamna hmang leh, enchhin tih thupuia neiin in vote rawn lei an tum dawn a, BJP sum pawh an rawn hmachhuan mai thei. Chumi hunah chuan fing tak leh Lalpa hre rengin lo awm ang che," a ti.

Mizoramah Mizo chauh an awm loh avangin BJP hian BJP angin seat hnih khat chu lak theihna remchang an nei ve mai thei tih sawiin Laltawnliana chuan, "Mah se, BJP hming loin seat tam tak an la thei bawk tih kan hriat a ṭha. MNF te hi BJP thawhpui chiang taka kan hriatte an ni," a ti a, MNF vote-tu chuan BJP a vote tihna a nih thu a sawi.

Laltawnliana chuan BJP thawhpui châk em emah ZPM puhin, "Pu Duhoma'n Mizorama kan sorkar chuan BJP-te nen hian ṭhianah kan insiam tho tho dawn a tih kha kan la hre vek ang. Tin, thla hmasa lawk khan Guwahati-ah Pu Duhoma hi zinin Mizoram BJP hotupa nen an zuk inhmu a ni. Heng zawng zawng ngaihtuah hian kan himna ber tur chu Congress party hi a ni tih kan hriat a ngai," a ti.