Vairengte - Rengtekawn inkar kawng Laih tura leivung paihna tur sawiho

Kolasib district bawrhsap John LT Sanga kaihhruaiin nimin khan DC conference hall-ah Vairengte leh Rengtekawn inkara national highway kawngpui laih tur (package 3&4) chhunga kawng laihna leivung paihna tur (muck disposal site) atana hmun ruahmante sawiho a ni a; leilung tichhe tam lo zawng leh a ṭul dan a zira tih danglam theih tura siam an rêl.

Ṭhutkhawmah hian leilung hausakna humhalh chunga hmasawnna hna kalpui a pawimawh thu leh inbûktâwk taka kalpui a nih loh chuan harsatna lian zawk thlentu a nih theih thu sawi a ni a; leivung paihna tur hmuna ruahmante hi Engineering, Procurement and Construction (EPC) zawm chunga kalpui tur a nih angin, leilung tichhe tam lo zawnga khawtlang duh dan leh a ṭul dan a zirin hnathawh hunah leivung paihna hmun pawh tih danglam theih ni se, an ti.

Kolasib paltlang tura kawngpui thlûr li (4-lane) laih turah hian package 3 chhungah leivung paihna hmun pariat leh package 4 chhungah hmun pasarih ruahman a ni. Leivung paihna hmun tur hian NHIDCL-in ram a lak tawh pawn lam ami hman a nih chuan zangnadawmna hranpa ruahman a nih loh tur thu tarlan niin, ram hawh man erawh contractor-te nen inbiakremna anga pek tur a ni.

NHIDCL mithiamte chhût danin, leivung 50% chu kawng laih thar huam chhung hmun hrang hrang hnawhkhah nan hman tur a ni a, 50% dang chu leivung paihna hmun tura siamah paih tur a ni.

Khawtlangin leivung hman ṭangkaina tur an neih chuan a remchan dan azirin ruahmanna siam sak theih a nih thu NHIDCL hotute chuan an sawi bawk.

He hunah hian Competent Authority for Land Acquisition (CALA), DFO, NHIDCL hotute bakah, Vairengte, Bilkhawthlir leh North Chhimluang VC leh YMA hruaitute an tel a ni.