Zangnadawmna pek thuai phutin Lawngtlaia EFCC office-te dang

Kaladan Multi Modal Transit Transport Project (KMMTTP) in a tihchhiat ram neitu intelkhawmten zangnadawmna an hmuhtheih loh vanga thuneitute an nawrna kalmekah nimin aṭang khan tiamchin awm loin, Mizoram Sorkar hnuaia Dy. Conservator of Forest, Chhimtuipui Wildlife Division Office, Environment, Forest & Climate Change, Lawngtlai a mi chu an dang.

Lawngtlai District Land Owners Association (LDLOA) president T Zatlunga chuan KMMTTP kawngpui km. 88 a thui ah Environment, Forest & Climate Ch​​ange (EFCC) department chuan km. 80 vel zet chu an ram angin an chhál tih sawiin, "Heihi a dik lo tih Gauhati High Court pawhin tichiang tawhin, ACB lam pawnhin an lo chhuichiang tawh," a ti.

Ram neitu diktak mi 138-te ram EFCC dept.-in a chuhpui tlat chu hriatthiam theih a ni lo tih sawiin LDLOA President chuan, "Ministry of Road Transport and Highway-ah EFCC dept. hian an ram anga an lo hauh ngawt a dik lo tih High Court-ah a tihchiang tawh," a ti a, thil awm dan chiang taka hrilhin clearance a pek thuai chu an phût tlat tih a sawi.

LDLOA-ten EFCC office-te an dannaah hian magistrate leh police-te an duty a, office kal luih tum awm loin, boruak duhawm lo a thleng lo.