Mizoram State Sports Council an ṭhukhawm

7th Mizoram State Sports Council (MSSC) chuan July 31, Thawhṭanni tlai khan Hawla Indoor Stadium conference hall-ah an president Robert Romawia Royte, Sports minister hoin general body meeting an nei.

MSSC chuan sorkar kumthar 2023-2024 chhunga sports association-te leh office inrelbawlna atan cheng nuai 2749.41 an ruahman a, state level association-te tan promotional fund-ah sorkar kumthar atan cheng nuai 215.50 a dah a ni.

District Sports Association 11-te inenkawl nan cheng nuai 25.35 , other promotional fund-ah cheng nuai 156.10 leh sports medicine atan cheng nuai 5.50 dah a ni bawk.

Meeting-a tarlan a nih danin, 7th MSSC tana PMJVK scheme hnuaia hnathawh zawh fel tawh pahnih leh hnathawh mek 82 a awm. Khelo India Scheme hnuaiah NEC sum hmanga hnathawh panga zawh a ni tawh bawk.

Sports ruhrel siam nan cheng vbc. 543.86 ruahman a ni a, central sorkar leh state scheme hrang hrang hmangin football, hockey leh futsal ground 15-ah synthetic turf (phullem) 15 phah zawh a ni tawh a, pakua siam mek a ni. Basketball court 28 siam mek a ni a, volleyball court 28 siam a ni bawk.

MSSC 2022-23 chhunga Non Residential Coaching Programme (NRCP) hnuaiah mipa 366 leh hmeichhia 97 an vaiin 463 an awm.

NRCP hnuaiah National level-ah medal 3, regional hnuaiah 12 leh state level 42 a vaiin medal 57 lak a ni tawh bawk a ni.