Vawksa aṭanga siam lakluh phal

Kolasib district magistrate John LT Sanga chuan Kolasib district-ah vawk pùl hri, African Swine Fever (ASF) leng mek chuan ziaawm lam a pan nia hriat a nih avangin ASF len lohna state-a APEDA in a pawmpui farm aṭangin vawksa aṭanga siam (frozen pork) lakluh phal a nih thu a tarlang.

District Magistrate chuan, ASF hri leng chu ziaawm deuh mahse hmun ṭhenkhatah a la reh fel lo nia hriat a nih thu tarlangin, "He hri hlauhawm tak laka mipuite kan him tlan zel theih nan ram dang leh state dang aṭangin vawk leh vawksa rep lakluh khap tlat a ni. ASF len lohna state-a APEDA in a pawmpui farm aṭangin vawksa aṭanga siam (frozen pork) lak luh phal a ni," a ti a; frozen pork lalut turte tan inkaihhruaina (SOP) zawm chungin AH&Vety Director phal­­na lak hmasak tur a nih thu a tarlang a ni.

District Magistrate thuchhuah

▶ ASF infected area-a puanna khua aṭangin vawk, vawksa aṭanga siam reng reng Kolasib district-ah lakluh phal a ni lo.

▶ Vawk damlo reng reng talh leh hralh khap tlat a ni.

▶ Vawk thi reng reng chinai nen thûk taka phum tur a ni.

▶ Vawk thi an awmin AH&Vety-a thawktute hnenah report tur a ni.

▶ Thupek hian chhuah a nih aṭanga ni 60 chhung a huam ang.

▶ Dan bawhchhia an awm chuan IPC Section 188 hmangin hrem theih an ni.