KHAWTHLIR

MLA-in hawng

Lunglei High Powered Committee vice chairman Lawmawma Tochhawng, MLA chuan nimin khan Lunglei Police Station building ground floor thawmṭhat a hawng. Police Station ground floor thawnṭhat hna hi Lunglei PS chuan HPC fund cheng nuai 15 sengin an thawk a; first floor thawmṭhat hna pawh HPC fund cheng nuai 15 sengin an thawh chhunzawm dawn a ni.

Heroin man

July 31, 2023 zan khan Special Narcotics PS leh BSF, Aizawl ṭangkawp chuan Bawngkawn, Aizawlah Gensawmtung (18) s/o Ginsianpau, Bukphir, Myanmar ni a inchhal kut aṭangin heroin gram 358 an man. July 31 zan vek khan Excise & Narcotics dept. pawhin New Siaha West-I-ah heroin gram 280 leh a neitu nia puh mi pahnih - Vanhnuaithanga (25) s/o T Siangmanga, No-Aotla-II, Siaha leh Rodingliana (29) s/o K Lalruata, New Siaha West-I ni a inchhalte an man. Heroin vanga mante hi thubuai siamsak an ni.

BLO training

Serchhip district-a booth level officer (BLO) 88-te tan DC conference hall-ah inthlan kaihhnawih training buatsaih a ni a, SDO (sadar) Rebecca Laldinmawii Hrahsel-in a hmanpui. Training-ah hian Summary Revision of Electoral Rolls-a BLO-te mawhphurhna leh tih tur hrang hrang mithiamte'n an hrilhfiah. Vawiinah AERO leh ERO-te pualin training neih chhunzawm leh a ni ang.

SMATEE

Higher & Technical Education (Technical Wing) chuan Mizoram quota-a State Medical and Technical Entrance Examination (SMATEE) 2023 seat chuh tumte tan August 3, 2023 tlai dar 3 thleng dilna thehluh theih a nih thu a tarlang.

Alumni Day

Zirtiri Residential Science College Alumni Association chuan nimin khan Durtlanga an college campus-ah Alumni Day vawi 7-na an lawm a, bialtu MLA Vanlalhlana'n a hmanpui. MLA chuan college kawng siamṭhat nan MLA fund Rs 1,00,000 a pe. Alumni Association hian college hmasawnna atan principal hnenah Rs 80,400 leh Hermon Children's Home hnenah an mamawh hrang hrang an pe bawk.