Draft electoral roll tlangzarh a ni; Mizoramah voter 8,38,039 an awm

Nimin khan district hrang hrangah district election officer (bawrhsap)-te'n Mizoram electoral roll ennawnna atana hman tur draft electoral roll an tlangzarh. Draft roll-ah hian voter 8,38,039 an awm.

Draft electoral roll-a voter 8,38,039-te chu mipa 4,06,747 leh hmeichhia 4,31,292 an ni a; service voter 5,021 an awm a, mipa 4,932 leh hmeichhia 89 an ni. Mizoram pumah polling station 1,276 a awm bawk.

Special Summary Revision of Photo Electoral Roll, 2023-ah hian October 1, 2023-a kum 18 tling chin thun theih a ni a; electoral roll-a la chuang ngai lo thun thar, paih tur leh insawn duhte tan August 31, 2023 thleng hun hawn a ni dawn a, mahni khua/venga booth level officer hnenah thehluh tur a ni. Dilna lutte chu September 22, 2023 ral hmain chinfel tur a ni a, October 4, 2023-ah Final Electoral Roll tihchhuah a ni ang.

Draft electoral roll hi DEO-te chuan political party tin hnenah an hlan nghal a; draft roll lei duh tan soft copy Rs 100 leh hard copy phêk khat Rs 5 zelin lei theih a ni.

Aizawl district draft electoral roll chu DEO Nazuk Kumar-i'n DC conference hall-ah a tlangzarh a; electoral roll buaipuitu official te, tlawmngai pawlte leh political party aiawhte an tel.

Aizawl district-ah Assembly constituency 12 awmin, chutah chuan polling station 321 a awm a, chawhrualin polling station pakhatah voter 876 zel awm ang a ni. Voter tlemna ber PS - Tuivawl biala Chhanchhuahna PS-ah voter 96 chiah an awm laiin, voter tamna ber Aizawl North-Ill biala Edenthar Veng-II PS-ah voter 1,398 an awm.

Lunglei district draft electoral roll chu DC Conference Hall-ah DEO Ramdinliani'n a tlangzarh a, political party-te hnenah a hlân. Lunglei district-ah hian Assembly constutuency parukah polling station 176 a awm a; voter 98,516 an awm a, mipa 48,841 leh hmeichhia 49,675 an ni.

Siaha DEO Lalhmunsanga Hnamte-in DC Conference Room-ah an district-a draft electoral roll a tlangzarh. Draft roll-ah hian Saiha bialai voter mipa 11,238 leh hmeichhia 12,188 awmin, an vaiin mi 23,426 an ni a; Palak bialah voter mipa 9,954 leh hmeichhia 10,189 awmin, an vaiin mi 10,189 an ni. District pumah polling station 81 a awm a, Saiha bialah PS 37 leh Palak bialah PS 44 a awm.

Champhai bawrhsap James Lalrinchhana'n DC Conference Hall an district-a draft electoral roll a tlangzarh. Champhai district draft roll-ah voter 56,438 awmin, mipa 27,560 leh hmeichhia 28,878 an ni a, kumin January 13-a final electoral roll tlangzarh tak aiin voter 76-in an pung.

Kolasib DEO John LT Sanga'n DC Conference Hall-ah Kolasib district draft roll a tlangzarh. Kolasib district-ah hian constituency pathum - Tuirial, Kolasib leh Serlui awmin, voter 62,659 an awm a, mipa 30,295 leh hmeichhia 32,364 an ni a, mipa 1,000 zelah hmeichhia 1,068 an awm ang a ni. January 13, 2023-a Electoral Roll tlangzarh aiin voter 697 (1.1%)-in a kiam a, voter kiam chhan ber chu Bru eng emaw zat paih vang a ni.

Serchhip draft electoral roll chu bawrhsap David Lalthantluanga'n a tlangzarh. Serchhip district-ah constituency pathum - Serchhip, Tuikum leh Hrangturzo a awm a, bial pathumah hian polling station 88 a awm. Serchhip bialah voter 20,409 awmin, mipa 9,599 leh hmeichhia 10,810 an ni a; Tuikum bialah voter 16,843 (mipa 8,345 leh hmeichhia 8,498) an awm a, Hrangturzo bialah voter 16,561 (mipa 8,174 leh hmeichhia 8,387) an awm.

Lawngtlai district-a Assembly bial pathuma draft electoral roll chu DEO H Lalhmingthanga'n DC Conference Hall-ah a tlangzarh. Draft roll-ah hian Lawngtlai district-ah voter 89,749 an awm a, service voter 232 an awm. Tuichawng bialah voter 35,372 awmin, Mizorama Assembly bial 40 zinga voter tamna ber a ni a; Lawngtlai West bialah voter 28,825 leh Lawngtlai East-ah voter 25,552 an awm a ni. Draft roll-ah hian Electoral Roll 2023 aiin voter 328 (0.37%)-in an pung.

Mamit DEO VL Remliana'n DC Conference Hall-ah draft electoral roll a tlangzarh. Mamit district-a Assembly constituency pathum - Hachhek, Dampa leh Mamitah polling station 121 a awm a, voter 63,688 awmin, mipa 32,155 leh hmeichhia 31,533 an ni. Mamit district-ah hian Tripura transit camp-a awm Bru, Mizorama vote nei ṭhin mi 4,941 paih a ni a, insawn dangte nen Mizoram Electoral Roll 2023 aiin draft roll-ah hian voter 4,950-in an tlem zawk.

Saitual district draft electoral roll pawh DEO Dr Lalngura Tlau-in a tlangzarh. Saitual district-ah hian Assembly constituency pathum - Ṭawi, Chalfilh leh Lengteng bialte a awm. Constituency tina khuate chu Saitual district chhungah an awm vek lo a; Ṭawi leh Chalfilh biala khaw ṭhenkhat chu Aizawl district-ah awmin, Lengteng biala khaw ṭhenkhat chu Khawzawl district-ah a awm nia thu dawn a ni. Saitual district-ah hian voter pangngai 55,100 leh service voter 534 an awm.

Khawzawl DEO K Lalrohlua'n DC conference hall-ah an district-a draft electoral roll a tlangzarh. Khawzawl district-ah hian Assembly constituency pakhat - Tuichang chiah a awm a, polling station 28 a awm a ni.

Hnahthial additional DC Lalvenhima'n an district-a Assembly constituency awm chhun South Tuipui biala electoral roll chu DC Conference Hall-ah a tlangzarh. Hnahthial district-ah hian polling station 27-ah voter 15,875 an awm a ni.