NGO-in Manipur-a Mizote tan Rs 17,90,723 an dawng tawh

NGO Coordination Committee (Joint NGO) chuan, Manipur tualchhung buaina vanga harsatna tawkte chhawmdawlna leh ṭanpuina atan nimin thleng khan thawhlawm Rs 17,90,723 an dawn tawh thu leh a luh belh zel tura beisei a nih thu an tarlang a, "Sum dawnte hi mamawhna ang zela hman a ni," an ti.

Joint NGO hruaitute nimina Central YMA Committee Room-a ṭhukhawm chuan, Manipur-a Zo hnahthlakte tawrhpui leh thlavang hauhna kawngzawh, July 25, 2023-a neihah an ngenna ngai pawimawha telte chungah an lawm thu an tarlang a, "Kawng zawh nía thawh chhuah mai duh tawk loa sum leh paia ṭanpuina kan unaute tana kan thawh khawmte kha a ropuiin lawmthu kan sawi a ni," an ti. Hun kal zel turah ram leh hnam tan ṭhahnemngai taka thawkho zel turin mipui an sáwm bawk.