August 7-12 chhungin khaw 190-ah IMI 5.0 thawh khatna kalpui dawn

National Health Mission (NHM), United States Agency for International Development (USAID) leh Momentum-te chuan nimin khan Aizawl Press Club-ah thuthar thehdarhtute pualin Intensified Mission Indradhanush (IMI) 5.0 zirhona an buatsaih. August 7-12, 2023 chhungin khaw 190-ah IMI 5.0 thawh khatna kalpui a ni dawn.

Zirhona hian NHM SIO Dr Lalmuanawma Jongte, ASIO Dr B Lalthantluanga leh JSI regional manager Dr DJ Borah ten IMI 5.0 chungchanga hriat tur pawimawhte an sawihfiah a; zawhna leh chhanna hun hman a ni bawk.

Tarlan danin, IMI 5.0 hi hri danna hrang hrang pek beihpui thlakna a ni a; ngawr (TB), zenghri, sentût, sentût tê, sakawr-êkhrik, hrawknapui, khuhhîp, hepatitis B, hemophilus influenza B, rotavirus, pneumococcus, natna dang ṭhenkhatte laka invênna damdawite a thlawnna pek a ni dawn. Mizorama awm tu pawh, hri danna la rualte hnenah pek vek tum a ni. 

IMI 5.0 thawh khatna hi August 7-12, 2023 chhungin Health department district pakuaa khaw 190-ah kalpui a ni dawn a; nau pâi mekte leh naupang kum nga hnuai lam zinga National Immunization Schedule hnuaia hri danna damdawi ei lo leh ei kim lote zingah kalpui a ni ang.

IMI 5.0 thawh hnihna chu September 11-16, 2023 chhungin Mizoram pumah kalpui a ni dawn a; October 9-14, 2023 chhungin thawh thumna kalpui leh tur a ni bawk.