Aizawl Sahuana sava bo Police-in la chhui chhuak lo

Aizawl Zoological Park-a sava chi khat (lears macaw), July 2, 2023-a bo chu police-in an chhui mek. Hriat theih chinah sava bo kaihhnawihah man an la awm lo.

Central YMA hnuaia ruihhlo dotu Central Anti Drugs Squad (CADS) chuan July 1, 2023 khan Seling daia lirthei an endiknaah lears macaw an man a, Environment Forest & Climate Change (EFCC) department hnenah an hlan. EFCC chuan Aizawl Sahuanah an dah a, Sahuana dah a nih tûk aṭangin hmuh a ni lo zui a ni.

Sava bo chung­changah hian Sairang Police Station-ah thubuai ziah luh a ni a; mi eng emaw zat thu zawhfiah ni tawh mah se, sava bo chhan leh a mawhphurtu chhui chhuah a la ni lo.

Sava bo chung­changah CYMA chuan thuchhuah an siam tawh a, sava a bo chu hriatthiam har an tih thu tarlangin, mawhphurtu zawng chhuak a, hrem an nih ngei theih nan hma la turin EFCC department an phût a ni.