Mumbai-a thawn tur lakhuihthei vailiam

Tuichangral Organic Farmer Producer Company (FPC)-in lakhuihthei an thar, Josie’s Kitchen, North East Cuisines, Mumbai-a hralh tur kg. 500 (quintal 5) chu nimin zing khan Agriculture minister C Lalrinsanga'n Millennium Centre kawt aṭangin a vailiam.

Sorkar thuchhuah tarlan danin, Mizorama thar lakhuihthei Mumbai-a hralh tur hi Mission Organic Mizoram leh Clover Organic-te hmalakna a ni a, September 2022 khan Sonipat, Haryana-ah Tuichangral FPC thar lakhuihthei metric ton 18 thawn a lo ni tawh. Tuichangral FPC hian September 2022 khan sorkar laipuia Ministry of Agriculture & Farmer’s Welfare aṭangin FPC award an lo dawng tawh bawk.

MOM leh Clover Organic-te hmalakna hnuaiah Tuichangral FPC hian April 28, 2023 khan Konkuwan Herbs nen insumdawn tawnnana tur (contract farming) inremna thuthlung an lo ziak tawh a ni.

Agriculture Minister chuan, Mizoram lakhuihthei hralhna tur zawnna atan Mumbai-ah kg. 500 thawn tum a nih thu sawiin, "Beisei anga a kal a nih chuan market nghet kan hmuh phah ngei kan ring. Khawzawl tlangdung lam lakhuihthei hi a tlangpuiin Giant Kew variety a ni a, a thlum tui bakah, tuna kan vailiam tur phei hi chu organic lakhuithei a nihna hian a hlutna a belhchhah hle a ni," a ti.

Minister sawi danin, Tuichangral Organic FPC-ah hian member 500 an awm a, khaw pariat - Tlangpui, Tlangmawi, Lungtan, Sialhawk, Khawhai, Chalrang, New Chalrang leh Vangtlang khuaa lakhuihthei chingtute an tel. Nikum khan lakhuihthei metric ton 30 vel an thar a ni.