Governor leh MRB Chairman inkâwm

Mizoram Rural Bank (MRB) chairman Sheryl L Vanchhong chuan nimin khan Raj Bhavan-ah Governor Dr Hari Babu Kambhampati a hmu a; Mizoram mipuiin awlsam leh ṭangkai zawka bank an hman theih dan tur te, bank la awm lohnaa bank branch hawn theih dan turte an sawi dun.

Governor chuan, MRB chu Mizorama bank inzár pharh zau ber a nih avangin mipui tana awlsamna thlentu a nih thu a sawi a; ni tina eichawp zawngte leh khawsak harsa zawkte dinhmun khai chhuah a nih theihna tura sorkar laipuiin ruahmanna a siamte nasa zawka tihhlawhtlin a pawimawh thu leh sorkar department-te leh bank-te ṭanghoin tihlawhtling thei se a duh thu a lo hrilh.

Sheryl L Vanchhong chuan MRB dinhmun, hmalak mekna leh an thlen chinte sawiin, Larsapin rawtna a neihte chu a remchan ang zela tihhlawhtlin an tum tur thu a sawi a; PMJDY account chu MRB branch zawng zawngin an hawnsak theih thu te, khawl hmang uar tura inzirtirnaah a thawhhlawk ber bank an nih thu te, mipui mamawh phuhru zel turin an inhawn thute a sawi bawk.