Saitualah Supply pisa hawn a ni

Food, Civil Supplies & Consumer Affairs (FCSCA) minister K Lalrinliana chuan nimin khan Saitual DC complex-ah District Civil Supplies Officer pisa a hawng.

Supply Minister chuan, hripui len laia mipuiin buhfai leh eirawngbawlna gas an hmuh theih nana sorkar hmalakna leh ruahmannate a sawi a, "FCSCA department ka enkawl ṭan tirha Mizoramin gas-a harsatna a neihte chu sorkar laipuiah ka thlen nghal a, central minister-in gas-a Mizoram harsatnate sutkian nan kan mamawh ang min pek a tiam a, eirawngbawlna gas kan mamawh ang kan dawng ta a ni," a ti a; sorkar laipui a dawr hnuah Mizoramin ni tin gas truck phur 17 a dawn ṭhin chu 23-ah tihpun a nih thu a sawi.

Sorkarna an chan tirhin Supply kudam 31 sakna hmuna sum bàng hmangin Kolasib DCSO office leh Mamit DCSO office sak a nih thu leh, buhfai, eirawngbawlna gas leh tuialhthei hnianghnar taka mipui pekna turin theihtawp a chhuah thu a sawi bawk.

Pisa hawnnaah hian Saitual DC Dr Lalngura Tlau leh Aizawl mayor Lalrinenga Sailo bakah, Saituala sorkar hotu dangte an tel. Saitual DCSO pisaah hian DCSO, inspector, sub-inspector leh group D pahnih an awm a, Supply kudam 10 an enkawl a ni.