'Ṭhat loh theih lohna báwm' thlir lêt; Kan tih theih ngei tur ka ziak - Lalsawta

Mizoram Pradesh Congress Committee (MPCC) chuan nimin khan Congress Bhavan-ah an president Lalsawta lehkha-bu ziah, 'Ṭhat loh theih lohna bâwm' thlir letna hun an hmang. Lalsawta chuan, a lehkhabuah an tih theih ngei tur a ziah thu a sawi.

Inkhawm hi MPCC general secretary Lalrindika Ralte, MLA-in a kaihruai a; Lalsawta chuan, a lehkhabu ziahah tih theih loh tûr a ziak lo nia sawiin, "Kan tih theih ngei tur ka ziak a ni. Chhuanthar, Baktawnga mite khian ṭhat loh theih lohna báwm an siam thei. Kohhran Thianghlim pawhin inkhuahkhirhna ṭha tak neiin ṭhat loh theih lohna báwm an siam. Mihringin an tum chuan tih theih loh a awm lo a, a ṭhat theih a ni," a ti.

MPCC President chuan, a lehkhabua inziak angin sorkar ṭha siam turin ṭhat lai leh theih laia chêt a ngai tih sawiin, "Mizoramah hian tlâk ngam ṭhak khawpa thil ṭha kan tih ngam chuan sorkar ṭha kan siam ang," a ti a, tlâk ngam chu tlâkna a ni kher lo tih hriat a ngaih thu a sawi.

ZPM-in Val Upa Council mitmei vên tur an nei tih sawiin Lalsawta chuan, "Congress party chuan kan mihringpuite mitmei ni loin, khawi hmunah pawh min hmutu Pathian mitmei kan vên chuan Pathian zarah sorkar ṭha kan siam thei ang. Mihring mitmei ven tûr nei ngahte hi MLA/minister atan kan duh lo. Pathian mitmei véng ṭhinte hi MLA leh minister atan kan duhte an ni," a ti.