Ni hnih chhunga NH-302 siamṭha ngei turin magistrate-in a hriattir

Lunglei district magistrate Ramdinliani chuan Hauruang leh Tlabung inkar kawngpui (NH-302) chu naktuk zing dar 6 aṭanga August 6, 2023 zing dar 6 thleng 407 ching chung lam zawh khap a nih thu a tarlang. Kawng chu lirthei chi tin tana August 6, 2023 zing dar 6 aṭanga zawh theih tura thawm ṭha turin BRN Infrastructure a hriattir bawk.

Ramdinliani chuan, NH-302 kawngpui chu lirthei tana zawh ngam loh khawpa a chhiat avangin rang taka siamṭha turin NHIDCL hnuaia contractor BRN Infrastructure thu a pe a, "Dîpdâltu awm loa ṭha taka hna an thawh theih nan Hauruang-Tlabung inkar kawngpui hi July 26-28, 2023 khan khâr a ni tawh. Mahse, vawiin thlengin kawngpui dinhmun a la ngai reng avangin Lunglei thlang lama maxicab services-in an maxicab-te an la tlantir lo chhunzawm zel a ni," a ti.

Harsatna sukiang turin Lunglei High Powered Committee vice chairman Lawmawma Tochhawng, MLA kaihhruaiin August 1, 2023 khan emergency meeting neih a nih thu tarlangin DC chuan, kawngpui chi lirthei chi tin tana August 6, 2023 aṭanga zawh thlaka siam a nih theih nan, NHIDCL-in rawtna an siam angin darkar 48 chhung kawngpui hi khâr rel a nih thu a tarlang bawk.