Hnam lama intihsiak dan tur rêl

Minister of state Robert Romawia Royte kaihhruaiin nimin khan a pisaah Mizo Cultural Organisation hruaitu te, School Education leh Tourism department hotute an ṭhukhawm a; tun August thla tàwp aṭanga zirna-in hrang hrangte tan Mizo hnam lâma intihsiak buatsaih dan tur an rêl.

Ṭhutkhawmah hian Mizoram pum huapin zirna-in chi hrang hrangte tan kumin August 31 leh September 1-a Mizo hnam lâm intihsiak buatsaih dan tur an rêl a; intihsiakah hian middle school, high school, higher secondary school leh college/university, tel duh apiang tel theih a ni ang.

Ruahman dan chuan, M/S zirlaite Cheraw Kân­tluang leh Chawng­laizawn hmangin an intihsiak ang a, H/S leh HSS-te Cheraw Kântluang leh Sarlamkai hmangin an inel ang a, college/university-te chu Cheraw Kântluang leh Chheihlàm hmangin an intihsiak dawn. Pakhatnate'n Rs 50,000, pahnihnate'n Rs 30,000 leh pathumnate'n Rs 20,000 an dawng dawn a ni.