KHAWTHLIR

World Youth Day

August 1, 2023 khan Portugal khawpui Lisbon-ah World Youth Day inkhawmpui lian vawi 35-na ṭan a ni a, India ram aṭangin mi 900 vel telin, Mizoram aṭangin mi pathum an tel. World Youth Day inkhawmpui hi Roman Catholic kohhranin Pope hoa ṭhalaite tana inkhawmpui an buatsaih a ni a, ram hrang hrang aṭangin palai 3,54,000 chuang an inziak lut tawh a ni.

MCMC thukhawm

Aizawl district Media Certification and Monitoring Committee (MCMC) chu an chairman Nazuk Kumar, Aizawl bawrhsap kaihhruaiin nimin khan DC Conference Hall-ah an ṭhukhawm. Kumina Assembly inthlanpui awm tur puala an ṭhutkhawm vawi khatna a ni a, Assembly inthlan kaihhnawiha advertisement chhuah leh chhuah man chungchang sawiho a ni.

Minister-in tlawh

Minister Lalrinawma chuan nimin khan a bial chhunga Rúllàm khua a tlawh a, khawtlang hruaitute nen inkâwmin, khaw hmasawnna atana an mamawhte an sawiho. Minister chuan, "Ka bial chhung hmasawnna leh enkawl kawnga ka ngaih pawimawh ber pathumte chu - eizawnna, hriselna leh zirna a ni," a ti.

Lawngtlai DC

Lawngtlai district bawrhsap thar H Lalhmingthanga, MCS chuan nimin khan Lawngtlai DC pisa a luah ṭan. Bawrhsap thar chuan, district mipui, tlawmngai pawl, kohhran, district council leh sorkar department hrang hrangte ṭawiawmna leh thawhpuina a ngen a, a ṭulna apiangah finchhuah turin a sáwm.

NIPUN Bharat

Mamit district Nipun Bharat Mission chairman VL Remliana, bawrhsap chuan nimin khan DC conference hall-ah Ministry of Education hnuaia NEP 2020 hmalakna, 'National Initiative for Proficiency in Reading with Understanding and Numeracy (NIPUN) Bharat' a tlangzarh. NIPUN Bharat hi naupang kum 3-9 inkarte'n ziak, chhiar leh chhiarkawpte a nihna leh awmzia chiang taka an hriatthiam theihna tura hmalakna a ni.

Lei zawh phal chin

Mamit SP Lalthangpuii Pulamte chuan thupek chhuahin, Borailuia lei (bailey bridge)-ah lirthei leh a thil phurh belh khawma metric ton 15 aia rit tlan khap a nih thu leh darkar khata km. 10 aia chaka tlân khap a nih thu a tarlang. Thupek zâwm lote chu MV Act hmangin hrem theih an ni.

Hostel sak endik

Sialkal Range Development Council (SRDC) Students Hostel & Education Committee hruaitute chuan nimin khan SRDC hnuaia Luangmuala Paite Tribal Girls Hostel sak mek an enfiah a; hna thawktute chu chak zawka thawk tur leh kumin chhunga sa zo hman turin an hrilh a ni.